Naalakkersuisut inassutigisaat Tasiortap tapersersorpai

Tasiortap, kinguaassiuutitigut atornerlugaasimasunik tapersersuiniaqatigiiffiup naalakkersuisut meeqqat inuusuttullu tungaasigut suliniutiginiagaat tapersersorpai.

Meeqqanik inuusuttunillu kinguaassiuutitigut atornerluisarneq Naalakersuisut suli sakkortunerusumik pinaveersaartinniarmassuk tamanna tasiortap nuannaarutigaa, isiginninnerup allanngortinneqarnissaa suliniutigineqalernissaa isumaginnikkullu akisussaaffimmik tigusisoqarnissaa pingaarluinnartuuvoq - aamma meeqqat inuusuttullu inuiaqatigiinni sumiginnagaasarnerujussuat eqqarsaatigalugu.

– Kinguaassiuutitigut atornerlugaasimasunik katsorsaasarfiliortoqarnissaanik siunnersuuteqartoqarnera pillugu Tasiortap partiit qutsavigiumallugillu siunnersuut tapersersorluinnarpaa. Ersersittuartariaqarparput meeqqanik inuussuttunillu atornerluisarneq akuersaanngisaannassagipput partiillu akuerissutigisassatut siunnersuutaat ilorraap tungaanut allorianreruvoq. Piaartumik suliniuteqalersaeneq kinguaassiuutitigut atornerluisarnerup akiorniarneqarnerani sakkussaavoq pingaaruteqarluinnartoq siunissamilu isumaginninnikkut suliniarnermi pingaarutilittut ilaajuartariaqartoq, Tasiortap siulittaasua Arnaq Grønvold tusagassiorfitsigut nalunaaruteqarluni allappoq.

Tasiortap kinguaassiuutitigut atornerluinerup inersimasunngornermi kingunerisartagai sorsuffigiuarlugillu maannamut pisarnermiit annerusumik tapersersuinissamut katsorsaanissamullu periarfissiisassaaq.

– Atukkat ingerlateqqinneqartartut kipitissinnaassagutsigit inersimasut ilinnialuarsimasunit katsorsarneqartarnissaat neqeroorutigisariaqarparput, tamakku katsorsarneqarsimanngitsunik anniaateqartarlutillu ajornartorsiuteqartarmata. Katsorsaanissamik neqeroorteqartarnerat angajoqqaat katsorsaaqataasinnaanerat nukittorsartassavarput tamannalu aqqutigalugu aamma meeqqat inuusuttullu siunissami kinguaassiuutitigut atornerluisinnaanerat pitsaaliortassallutigu, Arnaq Grønvold allappoq.

Taamaattumillu Tasiortap naalakkersuisut, kommunit soqutigisaqaqatigiiffiillu allat kinguaassiuutigut atornerluisarnermik akiuiniartut suleqatiginissaat qilanaaraa neriullunilu innuttaasut suli amerlanerusut ajornartorsiut akiorniarlugu piumassutsimik suliniaqatigiiffinnut peqataallutillu tapersersuiumaartut.

Powered by Labrador CMS