Pisortani ukiuni 50-ini sulisoq
Toqqorsivimmik paarsisoq Erik Andersen 1959-imi Qullissani aamaruutissarsiorfimmi mekanikeritut aallartippoq.
Toqqorsivimmik paarsisoq Erik Andersen 1959-imi Qullissani aamaruutissarsiorfimmi mekanikeritut aallartippoq.
Erik Andersenip pisortani sulisutut nalliuttorsiorneq misilittagaqarfigaa.
1984-imi ukiunik 25-inngortorsiorluni nalliuttorsiorpoq, taamanikkut GTO-mit (Grønlands Tekniske Organisation), qallunaat naalagaaffiannit pigineqartumit, tunissutisilluni.
1999-imi ukiunik 40-unngortorsiorpoq - tamatumuuna taamanikkut naalakkersuisut siulittaasuannit Jonathan Motzfeldtimit, Siumut, tunissutisillunilu inuulluaqqusitilluni.
2009-milu ukiunik 50-inngortorsiorpoq - tamatumuuna naalakkersuisut siulittaasuannut Kuupik Kleistimit, Inuit Ataqatigiit,tunissutisillunilu inuulluaqqusitilluni.
Asiaq-mili toqqorsivimmi paarsisup 78-inik ukiullip naatsorsuutiginngilaa amerlanerusunik nalliuttorsiorumaarluni.
- Qaqugu pinissaa suli ullulinngilara. Ukiortaamili soraarninngussaanga. Inuuninni suliasskka naammassisimassavakka, qungujulluni oqarpoq.
Taamak sivisutigisumik nunatsinniittussaasimanngikkaluarpoq.
Australia
Erik Andersen mekanikeritut ilinniarsimavoq 1959-imilu Kalaallit Nunaannut qinnuteqarluni, Australiamiit Danmarkimut tikikkami.
- Eqqarsarpunga pissanganassaqaaq. Nunamit allaminngaanneersimavunga pilersaarutillu malillugit Australiamut uteqqittussaallunga. Ukiup affaani Kalaallit Nunaanniittussaasimavunga. Maanili nuliara naapippara, pingasunillu qitornartaarpugut, taamaattumik maaniiginnarpunga, Erik Andersen oqarpoq.
Ukiut 13-it siulliit Qeqertarsuarmi Qullissani aamaruutissarsiorfimmi mekanikeritut sulivoq, 1972-imi matunissaata tungaanut. Tamatuma kingorna Nuummukarpoq sulilu tassani najugaqarlunilu suliffeqarluni.
- Illoqarfik tikinninniit allanngorsimasorujussuuvoq. Taamanikkut Nuuk Nuuginnaasimavoq, innersuussutigalugu illoqarfiup immikkoortui Nuussuaq aamma Qinngorput kingusinnerusukkut sanaartorfigineqalersut.
Nuummut tikinnermi kingorna GTO-mi biilinik entreprenørmaskiinanillu iluarsaaneq ingerlappaa. Ukiullu 20-t qaangiuttut - 1992-imi - pisortani sulinini nangippaa - nutaanik suliassaqalerluni.
Kalaallit Nunaanni misissueqqaarfik, Asiaq, naqqaniit aallartinneqartussaasimavoq, suliassaq GTO-mit tiguneqarmat. Erik Andersenillu toqqorsivik sunik tamanik atortulik, soorlu nunami uuttortaanermi atortut Danmarkimit tikittut, pilersittussaasimavaa.
- Teknikkikkut atortut pitsanngoriarsimasorujussuupput. GTO-mit kingoraakkatta ilaat 1950-ikkunneersuusimapput. Ullumikkut nutaaliaanerusorujussuupput, Erik Andersen oqarpoq.
Tamatuma saniatigut ukiuni 50-ini allannguutit imatorsuusimanngillat, nalliuttorsiortoq isumaqarpoq.
- Aamaruutissarsiorfimmiit Nuummut tikilluni, biilinik iluarsaanani toqqorsivimmik paarsilluni soorunami allaaneruvoq. Assersuutigaluguli inuit imminnut pissusii ukiuni 50-ini allanngorsimanngillat, Erik Andersen oqarpoq.