Oqaluffiit sila pillugu siarngutissapput
Silap pissusaa pillugu Københavnimi decembarip 13-anni ataatsimeersuartoqalerpat oqaluffiit siarngisa sianertinnissaat Danmarkimi biskoppit akuerereerpaat. Nunatsinni aamma taamaattoqarnissaanik biskoppi kaammattuivoq.
Siarngit 350-eriarlutik sapaammi decembarip ulluisa 13-ianni kasunneqassapput, taamaalilluni nunarsuarmi ilagiit naalagaaffinni siuttunut nunarsuup paarilluarneqarnissaata pingaassusia oqariartuutigissallugu. Taamalu aamma CO2-mik aniatitsineq nunarsuarmi silap kiatsikkiartorneranut pissutaasoq iliuuseqarfigeqqullugu.
Nunatsinnimi biskoppip Sofie Petersenip palaseqarfinnut ilagiit sinniisaannullu kajumissaarutigeqqammarpaa oqaluffiit sianertitsisinissaannut peqataaqqullugit, sumiiffinnili ataasiakkaani aalajangissavaat sianerusunneerlutik, Sofie Petersen KNR-ip radioaviisianut oqarpoq.
- Sianernissaq tapersersorpaa, pissutigalugu sapaatini ullunilu allani naalagiarnerni upperisamik nassuerutiginnittoqartarmat, Guuti ataataq pinngortitsisuusoq upperalugu.
- Uagut nammineq pinngoritamik paarseqataasutut inissisimavugut aammalu kristumiussutsimi tullimut asanninnermut attuumalluinnartoq pingaartuummat. Tulleq sumiikkaluartorluunniit silap pissutsaata allanngorneranik eqqugaasoq aamma ikiorserniarsinnaagatsigu, nangippoq.
Politikkimut akuliunnertut isiginngilaa, naak nalunngikkaluarlugu Danmarkimi ilagiit ilaannit politikkimut akuliunnertut isummersorfigineqartoq.
- Uagut aamma pisussaaffigaarput aalajangiisussat eqeersarniassallugit immaqaluunniit sunnerniassallugit, biskoppi oqarpoq.
Københavnip Oqaluffissaarsuani Københavns Domkirkemi decembarip 13-ianni naalagiarnermut nunat tamalaat aallartitaat peqataassapput, aamma nunatta biskoppia.
- Naalagiarnissami siuttorpassuit najuunneranni uanga ujarak nunatsinninngaannneersoq tigummiarlugu qinnussissaanga. Aamma erinarsoqatigiit Aavaat naalagiarnermi tassani marlunnik atuissapput, nassuiaavoq.