Kapuutissat siulliit takkutilerput
Peqqinnissaqarfimmi sulisut inuillu navianartorsiortut siulliullutik kapitinnissaminnik neqeroorfigineqassapput, nualluummut A-mut (H1N1) akiuussutissaq Kalaallit Nunaannut tikippat.
Nualluummut A-mut (H1N1) kapuutit sapaatip akunnerani tullermi Kalaallit Nunaannut tikissaaq.
Peqqinnissaqarfiulli inniminnigaanit katillugit 32.000-init 4.000-iinnaat tikissapput. Tamatumunnga pissutaavoq akiuussutissamik Pandemiximik tunisassiortoq taassuminnga piniartunut malinnaasinnaanngimmat.
Taamaattumik qularnanngitsumik sapaatit akunneri arlallit aatsaat ingerlareerpata akiuussutissanik allanik tikittoqaqqissaaq, nakorsaanerugallartoq Jens Otto Veje sermitsiaq.gl-imut oqarpoq.
Kapuutit illoqarfinnut tamanut agguaanneqassapput inuttussusaat malillugu. Nuummut 800-t missaanniittut tunniunneqassapput.
Nakorsiartarfiup inuit navianartorsiortut kapitinnissaannik neqeroorfigissavai. Tamatuma saniatigut Dronning Ingridip Napparsimmavissuata peqqinnissaqarfimmi sulisut, pinartumik napparsimasunik tigusisut, misissuisut katsorsaasullu kapitinnissaannik neqeroorfiginiarpai, Jens Otto Veje oqarpoq.