Inuusuttut klubbianni gassi
Nuummi politiit sapaatiummat inuusuttut klubbiannukarput inuusuttut anernikilliulerlutillu merianngulersimammata, ikittaatit gassiannik naamaarsimalermik peqquteqarunartumik.
knr.gl-ip allaaserisaa naapertorlugu politiit inuusuttut klubbiannut Inneruulanut Nuussuarmiittumut sapaatiummat unnuakkut ataatsinut aggeqquneqarsimapput, inuusuttut inimut serpalittaammik qasilitsulimmik serpalittaasoqarsimanasorimmassuk.
Politiilli isumaqarput serpalittaammik qasilitsulimmiunngitsoq kisiannili ikittaatit gassissaannik serpalittaasoqarsimasoq.
– Serpalittaammik qasilitsulimmik serpalittaasoqarsimanngilaq, tamannali eqqissiallannarnerulinngilaq, politeeq Poul Hansen oqarpoq, tassami ikittaatit gassissaannik inimut serpalittaasoqarsimappat qaartortoqarsinnaanera ulorianaateqarpoq.
– Qujanartumik inuusuttut klubbianni pujortarneq inerteqqutaavoq, taamaattorli ikittaatit gassissaannik serpalittaasoqarsimatillugu qaartoortoqarsinnaanera aarlerinartuaannartarpoq. Tikiukkatta taamaaliorsimasut qimagutereersimammata kingorna taamaaliortoqaqqinnginnissaa sakkortunerpaamik kajumissaarutigaarput, Poul Hansen Nuummi politiineersoq KNR-ip radioavisianut oqarpoq.