Maliina A.: Nukappiaqqat malittareqqissaartariaqarput
Nukappiaqqat angutillu inuunitik qanoq isigisarneraat isumaginninnermut naalakkersuisup annerusumik paaserusuppaa, taamaattoqanngippat imminortarnermik pinaveersaartitsinissaq ajornakusoortussaammat.
Issittuni imminortarnermut tunngatillugu niviarsiaqqat tamanna eqqarsaatigiinnartarpaat. Nukappiaqqalli piviusunngortittarpaat.
Kalaallit Nunaanni imminortartut pingasorarterutaat marluk tassaapput angutit inuusuttut 15-20-nik ukiullit. Issittuni sanilerisatsinni aamma taamaappoq.
Kisianni sooq taamatut pisoqartarpa, naalakkersuisuni ilaasortaq Maliina Abelsen, IA, aperivoq.
– Nukappiaqqat angutillu inuusuttut qanoq eqqarsartarnerat paasisaqarfiginerusariaqarparput. Arnat angutillu iliuuserisartagaasa assigiinngissusaat paasisaqarfiginerusariaqarpagut. Soorlu sooq niviarsiaqqat ilinniakkaminnik naammassinnikkajunnerusarpat?
Imminortarneq pinaveersaartinniarlugu seminareqarnermi Kalaallit Nunaanni naalakkersuisut sinniisaattut peqataatilluni Maliina Abelsen aperivoq.
Inuusutut peqataasut isumaqarput angutit misigissutsiminnik ersersitseqqusaasannginnerat tamatumani peqqutaasoq.
Angutit inissisimanerat Issittuni inuiaqatigiit sukkasuumik allanngoriartorneratigut allanngorsimavoq, angutit pilersuisuunissaat qangatut pingaaruteqartigiunnaarmat.
Aamma imaalluarsinnaavoq angajoqqaat ernitik inuunermi ajornartorsiutimik qanoq suliarisarnissaannut perorsarluartarsimanngikkaat, inuusuttut Alaskameersut, Nunavumeersut, Kalaallit Nunaanneersut Norgemilu Samet nunaanneersut isumaqarput.
Meeqqat inuusuttullu nunatsinni suminngaanniilluunniit oqarasuaammut 134-imut akeqanngitsumik sianerlutik siunnersuisartuinnit siunnersorneqarsinnaapput.
Telefuuni ammasarpoq ullut tamaasa nal. 19.00-21.00.