Imminnut toquttartut ikiliartulerunarput
Imminortartut ikiliartorput. Peqqinnissaqarfilli suli neriulluarpallaaqqusinngilaq.
Kalaallit Nunaanni inuit imminortartut ukiuni kingullerni ikinnerulersimapput.
2006-imi imminortut 58-iusut, 2007-imi aamma 2008-mi ikileriarlutik imminortut 38 aamma 35-upput.
Nalunaarsukkalli avaanngunartut suli allannguissorsimanngeratarsinnaammata peqqinnissaqarfik mianersoqqusivoq.
– Neriuppugut ikiliartuinnarumaartut. Pissutsilli ukiuni tulliuttuni malinnaaffigigallassavagut, suliniummik ataqatigiissaarisoq Jette Eistrup Namminersorlutik Oqartussat pinaveersaartitsiviannit Paarisameersoq oqarpoq.
Allanngorneq taama annikitsigitillugu kisitsisit mianersuunneqartariaqarnerarpai.
Nakorsaqarfinnik nakkutiliisoq Flemming Kleist Stenz aamma utaqqimaarallarpoq.
– Uangattaaq neriuttorujussuuvunga, ukiunili tulliuttuni qanoq ingerlasoqatrnissaa takoqqaarallartariaqarparput, Flemming Kleist Stenz oqarpoq.
Kalaallit Nunaanni misilittakkat imminortarneq pitsaaliorniarlugu sapaatip akunnerata naanerani Nuummi seminareqarnissarsuarmi eqqartorneqassapput.
Sermitsiaq nr. 45 atuaruk.
Ikiorneqarusukkuit: Sianerfigiuk 134
Meeqqat Inuusuttullu Oqarasuaataat
Oqarasuaatip ammasarfii: Ullut tamaasa nal. 19.00-21.00