Issittumi imminut toquttartarneq oqaluuserineqalerpoq

Issittumi imminortarneq pinaveersaarniarlugu Kalaallit Nunaanni illoqarfiit pingaarnersaanni sapaatip akunnerata naanerani ataatsimeersuartoqassaaq.

Kalaallit Nunaat novembarip 7-iani aamma 8-ni issittumi ataatsimeersuarnermi qaaqqusisuuvoq imminortarneq pinaveersaartinniarlugu ataatsimeersuarneq taaguuteqarpoq: "Neriuuteqarneq aamma Inuunissamut Sapiissuseqarneq". Assi: Sermitsiap toqqorsivia.

Ataatsimeersuarneq Paarisap, Issittumi Inuusuttut Suleqatigiiffiata, Inuit Circumpolar Youth Councilip (ICYC) nunanullu allanut naalakkersuisoqarfiup suleqatigiillutik aaqqissorpaat. Ataatsimeersuarneq arfininngornermi ullaakkut peqqissutsimut naalakkersuisumit Agathe Fontain, IA-mit ammarneqassaaq.

Peqataasut ilagaat Issittumi Siunnersuisoqatigiit peqqinnissaq pillugu immikkut ilisimasallittut sinniisui, tassaasut issittumi peqqinnissakkut professori Peter Bjerregaard, aamma immikkut ilisimasallit siulittaasorisaat kiisalu peqqinnissaqarfimmik nakkutilliisoq Flemming Kleist Stenz kiisalu nakorsaq Gert Mulvad.

Tamakkua saniatigut Canada (Nunavut, NWT), Alaska, Kalaallit Nunaat, Danmark, Norge aamma Sapmi (saami nunaat) peqataatitaqassapput.

Aaqqissuussinerup siunertaraa assigiinngitsunik inuusuttunillu sullissisut attaveqaqatigiinnik pilersitsinissaat aammalu ilisimasaminnik paarlaasseqatigiinnissaat - kiisalu qanoq iliuuseqarnissamut paasissutissanik uppernarsaatissanillu katersinissaq, taamaasilluni inuusuttut Issittumiittut inuunermut neriuutaarutinnginnissaat anguniarneqarsinnaassammat.

AAMMA ATUARUK: Imminortarnermik oqallinnermi inuusuttut tusaaneqassapput

Ataatsimeersuarnerup kingorna pinaveersaartitsinermut siunnersuutit assersuutillu pitsaasut allakkiarineqassapput, nunap iluani isumassarsiorfissatut atorneqassallutik. Tamatuma saniatigut Issittumi Siunnersuisooqatigiit peqqinnissap tungaatigut suleqatigiissapput.

Powered by Labrador CMS