Inuusuttut peqataatillugit
Imminortarnerit appartinnissaannut Issittumi inuusuttut aqqutissaapput, peqqissutsimut naalakkersuisoq oqarpoq.
Issittumi imminortarnerit ataatsimuussutigaat imminortartut amerlanerpaat tassaammata angutit inuusuttut.
Taamaattumik pingaaruteqarpoq inuiaqatigiit tusaaniassagaat inuusuttut qanoq innersut. Taamaanngippat imminortarnerpassuit ikilisinneqarsinnaanavianngillat.
Taamatut oqariartuuteqarpoq peqqissutsimut naalakkersuisoq Agathe Fontain, arfininngormat isumasioqatigiinneq ´Imminortarnerup pitsaaliorneqarnerani neriunneq inoorusussuseqarnerlu´ammaramiuk.
– Isumaga malillugu inuunerup pitsaassusaata iluatsilluartumik siuarsarnissaanut issittumi inuusuttut pingaarutilerujussuarmik inissisimasut, Agathe Fontain oqarpoq.
Taanna isumaginninnermillu naalakkersuisoq Maliina belsen periarfissaqarput tusassallugu issittumi inuusuttut qanoq isumaqarnersut, inoorusunnermut suut pisariaqartinneqarnersut.
Tamanna pissaaq sapaatiuppat, inuusuttut isumasioqatigiinneranni, Inuit Circumpolar Youth Council-imit (ICYC) aaqqissorneqartumi, saniatigut ingerlanneqartumi, peqataasut inassuteqaatiminnik saqqummiussippata.
Isumasioqatigiinneq aaqqissuunneqarpoq makkuninnga: PAARISA, Inuit Circumpolar Youth Council (ICYC) aamma Namminersorlutik oqartussat Nunanut allanut Psisoqartaqarfiat.