Uran pillugu oqallinnermi IA eqqissisimaqqusivoq
Partiip aatsitassat piiarneqarsinnaatitaasut suulluunniit uranimik akuanik qaffasinnerpaaffiliilluni pipallatamik inatsisiliornissaq mianersoqqussutigaa.
Ilisimasaqarnerunissaq pisariaqarpoq, misissuinerit amerlanerit pisariaqarput aammalu innuttaasut oqallinnerunissat pingaaruteqarpoq, aatsitassat suulluunniit uranimik akuanik qaffasinnerpaaffiliilluni piiarneqarsinnaalissappata.
Inuit Ataqatigiinnit avatangiisimut eqqissisimatitsinermullu ataatsimiititaliami ilaasortaq Jane Petersen isumaqarpoq.
– Suli piffissanngunngilaq urani imaluunniit aatsitassat allat qinngornernik ulorianartunik akullit piiarneqarsinnaalernissaannut, taama Jane Petersen Siumukkut siunnersuutaannut qisuariaammini allappoq. Siumup siunnersuutigaa Kalaallit Nunaanni aatsitassap piiarneqarsinnaatitaasup suulluunniit uranimik akua 0,1%-imut qaffasinnerpaaffilerneqassasoq. Siunnersuut sapaatip akunnerata siuliani Inatsisartuni oqaluuserineqarpoq.
IA-p mianersoqqussutigaa inuiaqatigiit aatsitassat pillugit ataasiinnarsiortumik allannguerusulersinnaanerat. Taamaattoqassappat innuttaasut peqataasariaqarput:
– Aningaasarsiupallanniarneq piinnarlugu aammalu inuiaqatigiit suut maannamut naleqartutut isigisaat soorlu aalisarneq, piniarneq savaateqarnerlu aatsitassarsiornermut sangutineqassappata, taava Inuit Ataqatigiit isumaqarpugut innuttaasut tamarmiusut tamanna isummerfigeqqaarlugu aalajangigassarigaat.
- Inuiaqatitta aatsitassat pillugit oqallinnermut suli sukumiisumik paasissutissanik pisimanngitsut, qulaaniit Inatsisartuni aalajangiussinissatsinnik kisitsimmik 0,1 % -mik uranip akuata qaffasinnerpaaffilernissaannik siunnersuuteqarnerat, Jane Petersen IA-mit oqarpoq.