NAPA nutaamik pisortartaalerpoq
Eskimolog Leise Johnsen, Nunani Avannarlerni Piorsarsimassutsikkut Attaveqaammi pisortanngorpoq.
Leise Johnsen Kalaallit Nunaanni ilisimaneqarpoq Jette Bangip assilisaannik saqqummersitsinermi 'Kinaana' 2006-imi saqqummersinneqartumi peqataatinneqarmat.
Assilisanik saqqummersitsinerit NAPA-p siunissami suliniutigiumaagassaannut ilaapput, pisortaq nutaaq oqarpoq.
– Assit ajornanngitsunnguupput ungasissorsuarmut angallanneqarsinnaapput paasissutissiissutitullu pitsassuullutik, Leise Johnsen sermitsiaq.gl-imut oqarpoq.
Leise aamma isumaqarpoq pingaaruteqartoq Kalaallit Nunaata kulturiata nunap avataanut takutinniarneqarnissaa.
– Nunarsuarmi Kalaallit Nunaat isiginiarneqartorujussuuvoq. Aatsaat taama pingaaruteqartigaaq Kalaallit Nunaata nunarsuup sinneranut imminut sassarsaanniarnissaa, nunap nammineq pigisai tupinnaannartut takutitassiarineqartariaqarput tamatumalu kingorna nutaamik eqqarsalernissamut, ineriartornissamut alliartornissamullu periarfissiisoqaqqullugu, pisortanngortinneqarnerminut atatillugu oqarpoq.
Leise Johnsenip 45-nik ukiullip, Telemi nittartakkami aaqqissuisutut atorfik qimappaa. Aamma NAPA-p nittartagaa pisortanngortup ineriartorteqqinniarlugu eqqarsaatigaa.
– Tusagassiissutit tamatigoortut atorluarnerusariaqarpagut. NAPA-p nittartagaa aamma tusagassiissutit nutaaliaasut atorlugit ineriartorteqqinneqassaaq, Leise Johnsen oqarpoq
Leise Johnsen NAPA-p pisortaatut atorfittaamini februaarip 15-ianni 2010 ivertinneqassaaq. Taassuma Anders Berntsson paarlassavaa,ukiuni arfineq-pingasuni pisortaasimasoq.