Nualluummut kapitinneq kingunipiloqarpoq
Nualluummut A-mut akiuussutissamik kapuummik atuinissaminnut Schweitzimi tunuarsimaalereerput, kapitereernerup kingorna kingunipiluutaasinnaasunut ilisimasakippallaarneq pissutaatinneqarluni. Danskit ilisimasallit mianersoqqusipput.
Inuit sanngiitsut kapitinnerisa kingorna kingunipiluutaasinnaasut iluamik ilisimaneqanngillat, kapuuinissarlu aningaasarparujussuarnik naleqartoq pillugu ilisimasaqarluartut isornartorsiutaat aviisimi Børsenimi atuarneqarsinnaapput.
– Nunat Schweizitut ittut paasisinnaavakka naartusunik meeqqanillu kapuuinissaminnut tunuarsimaarmata, taakkumi inuiaqataasunit tamanit sanngiinnerpaajupput. Nualluummut H1N1-imut kapuuinissamik aaqqissuussineq nakorsaateqarnerup silarsuaani ileqqorineqartut nalinginnaasut avaqqullugit ingerlanneqarpoq, Peter Skinhøj, Rigshospitalimi professori, dr. med. Børsenimut oqarpoq.
Mauri Johansson, siunnersorti aammalu arbejds- og samfundsmedicinimi immikkut ittumik nakorsaanertut soraarneq Århusimeersoq, isornartorsiuisunut ilaavoq.
– Kapitinnerup kingorna kingunipiluutit sakkortuut piffissami aggersumi takuneqartalersinnaapput, Danmarkimili nakorsaatitornerup kingorna kingunerlutsitsisarnerit oqaluuserineqarneq ajorput, Mauri Johansson oqarpoq nangillunilu WHO-p ukiualuit matuma siorna pandemiimik nalilersueriaaseq allanngortippaa, taamaattumik suliniaqatigiiffiup ullumikkut nappaat sunaagaluarluunniit erngerluni nappaatitut ulorianarluinnartutut tunillaatipallattutullu taasinnaallugu.
Kapitereernerup kingorna kingunerluutit ilagisinnaavaat inuunilunneq, uissannguneq, tipimik mamamillu naamasaarunneq, meriannguneq aammalu qulliliorneq.
Danmarkimi peqqinnissaqarfimmik nakkutilliisoqarfiup nualluummut A-mut kapuuinissaq suli aalajangiussimavaa, tamannalu nunatsinni peqqinnissaqarfiup annerpaartaatigut malissallugu aalajangiussimavaa.