Takornariaq toqungasoq misissorneqarpoq
Misissuinermi paasineqanngilaq amerikamit takornariap 42-nik ukiullip Kangerlussuarmi sapaammi toqungasoq nassaarineqartup suna toqqutigisimaneraa.
Amerikamiup takornariap 42-nik ukiullip sapaatiummat Kangerlussuarmi qiusup timaa aqagu Amerikamut angerlaanneqassaaq, knr.gl allappoq.
- Timimik toqungasumik misissuisartoq Danmarkimeersoq Kangerlussuarmi toqusut inaanni misissuivoq, Lars Grunnetillu oqarnera malillugu sumik pasinarsinnaasumik nassaartoqarani.
– Timimik toqungasumik misissuisartup amerikamioq 42-nik ukiulik nappaatinik tunillaassuussinnaasunik akornuteqannginnerarpaa, allanillu oqaasissaqarani, Lars Grunnet oqarpoq.
knr.gl naapertorlugu nutaanik paasissutissiisoqanngilaq takornariaq Kangerlussuarmi suniarsimagaluarnersoq. Lars Grunnet erseqqissaavoq toqusimanera politiit ajutoornermik pissuteqartutut isigigaat, pisorlu pillugu annerusumik misissuisoqaqqissanngitsoq.
Timi toqungasoq politiinit piareersarneqarpoq, politeeqarfiullu pisortaata Lars Grunnetip oqarnera naapertorlugu tamanna "pisariulaarluni".
– Timaa illerfimmik zinkimik aqerlortikkamik pooqartillugu angallanneqassaaq. Taava illerfik zinki karsimut allamut silaannaakkamut tunillannaveersakkamullu poortorneqassaq. Tamatuma saniatigut timip toqungasup USA-mut nassiunnerani pappiaratigut immikkut suliassarpassuit pisariaqarput, Lars Grunnet nassuiaavoq.