Naalakkersuisooqatigiit tusagassiuutit pillugit assortuupput
Tusagassiuutit ajornartorsiutaat KNR-imut tapiissutit ilanngarnerisigut aaqqinnavianngillat, IA isumaqarpoq, kajumissaarutigalugulu suliffeqarfiit oqaloqatigineqassasut, qanoq aaqqiinissaat qulaaniit aalajangersornagu.
Tusagassiuutit siaruarterneqanerannut tapiissutit pillugit naalakkersuisuutitaqartut Inuit Ataqatigiit naalakkersuisooqatiminnut Demokraatinut isumaqataanngilluinnarput.
Demokraatit aningaasaqarnikkut oqaaseqartartuata Niels Thomsenip ataasinngornermi siusinnerusukkut siunnersuutigaa tusagassiuutit qinnuteqarfigisinnaasaannik aningaasaateqarfiliortoqassasoq, aviisit ioqarfinni naqinneqarsinnaalernissaannut ilaatigut aqqutissiuussisussamik. Aningaasat KNR-imut aningaasaliissutaasartut ilanngarnerisigut pissarsiarineqassasut Demokraatit siunnersuuteqarput.
Tamannali Inuit Ataqatigiit isumaqatiginngilaat. Taarsiullugu suliffeqarfiit oqaloqatigineqarnissaat kajumissaarutigaat.
- Ernummatigaarput aningaasatigut ikilisaasoqarpat inuiaqatigiit KNR-imit sullinneqarnerat ajorseriarujussuassasoq. Taamaattumillu Demokraatit siunnersuutigisaat malinneqassappat ajornartorsiut tusagassiorfimmiit tusagassiorfimmut allamut nuunneqaannassaaq, aaqqiivigineqaranilu, inatsisartuni ilaasortaq Jane Petersen allappoq.
- Isumaqarpugut politikkikkut suliassarinngikkipput teknikkikkut aaqqiissutissamik tikkuussissalluta, naqiterigasuarsinnaasunik illoqarfinni tamani atortulersuinikkut imaluunniit allatigut aaqqiissoqassanersoq ilisimasallit tusagassiorfinnilu suliaqartut peqatigalugit nassaarineqartariaqarpoq.
Naalakkersuisut suliaqartunik oqaloqateqarnissaat suleqateqarnissaallu tuavisaarutigaa, aningaasanut inatsimmut 2010-moortumut ukiunullu aggersunut aaqqiissutissamik nassaarasuarnissaq anguneqarniassammat.
- Inuit Ataqatigiit piareersimavugut aningaasatigut aaqqiissutissanik ujaarleqataassalluta, suliaqartut peqatiginerisigut, Jane Petersen allappoq.