Aqqusinertigut angallanneq ataavartumik nakkutigineqartanngilaq
Angallannermi sukkalisaarneq toqutsisarpoq, Kalaallit Nunaannili sukkassutsimik uuttortaatinik ikkussisoqarnissaa pilersaarutigineqanngilaq.
Juunip 27-ianni Nuummi aqqusinermi ajunaarneq alianartoq angutip 28-nik ukiullip arnallu 19-inik ukiullip inuunerinik akeqarpoq. Aqqusinermi ajunaarneq mittarfimmut aqqutaani pivoq. Tassani sukkalisaarlutik biilertunik ajutoortoqartareernikuuvoq; ilaatigut december 2008-mi arnaq inuusuttoq, biilip ilaaffigisami sukkaqaluni napparummut aporneratigut ajunaarluni.
Danmarkimi sukkassutsimik uuttortaatinik ataavartunik ikkussuisoqarnikuuvoq, tamakkulu inuttaqanngikkaluarlutik biilit sukkasuumik ingerlasut assiliortortuartarpaat. Tamanna pinaveersaartitsinermut iluaqutaasumik sunniuteqarsimavoq ajunaarnissaagaluanillu pinngitsoortitsisarsimalluni, Kalaallit Nunaannili sukkassutsimik uuttortaatinik ataavartunik ikkussuinissamik pilersaaruteqartoqanngilaq.
Uuttortaatit sumiiffinnut ajunaarfigajunnerusunut ikkunneqartarput, Nuullu isigigaanni sumiiffimmik ataatsimik – 100 meterit iluanni – amerlasooriarluni ajunaarfiusimasumik tikkuagassaqanngilagut, taamaattumik taamaaliornissamik pilersaaruteqanngilagut, politimesterip tullia Morten Nielsen oqarpoq.
Danmarkimi »stærekasse«-nik taaneqartartunik (sukkassutsiik uuttortaatit) Sjællandimi sumiffinnut assigiinngitsunut 10-it missaanniittunut ikkussisoqarsimavoq. Svenskit pisarnerat issuarlugu; sukkassutsimik uuttortaatinik 1.000-inik Sverigemi aqqusinermut ikkussuisoqarsimammat, tamannalu naatsorsukkani malugineqarsinnaalereersimavoq. Danmarkimi innuttaasut 1 milliuuniugaangata ukiumut inuit 73-it aqqusinermi ajunaartarput, Sverigemili innuttaasut 1 milliuuniugaangata ukiumut inuit 47-iinnaat aqqusinermi ajunaartarput.
Sermitsiaq nr. 40 atuaruk...