Rotary ikiortigalugu
Kalaallit Jyllandip avannaani ilinniagaqartut peqatigiiffiata JAKIP-ip Aalborg Søndre Rotaryklub siunnersuisutut suleqatigilerpaa.
Kalaallit ilinniagaqarlutik Aalborgimiittut Frederikshavnimiittullu siunissami Aalborg Søndre Rotaryklubimit misilittakkat piginnaasallu pillugit siunnersorneqartassapput.
Taakku siunnersueqatigiittarniarlutik isumaqatigiissusiorput. Ilinniagaqartut unammisassani, eqqarsaatini siunissamullu isumassarsiani pillugit ukiumut pingasoriarluni sisamariarluniluunniit oqaloqatiginninnissaminut periarfissinneqassaaq, suleqatigiilersut tusagassiorfinnut allapput.
Ukiut marluk matuma siorna Rotary klubbi ilisimasatik attuumassuteqarnertillu Kalaallit Nunaanni annertusarniarlugit tapersersugassaminnik ujaasipput. Siorna Kalaallit Nunaannut tikeraarput illoqarfimminni peqatigiiffinnik ataatsimeeqateqartarnerminni naapippaat JAKIP, »Jyllandip Avannaani Kalaallit Ilinniagaqartut Peqatigiiffiat«.
JAKIP peqatigiiffiuvoq Kalaallit Danmarkimi ilinniagaqartut kattuffiata AVALAap ataanni inissisimasoq. Ukioq atuarfiusoq nutaaq aallartimmat 125-inik ilaasortaqartoq. Ilinniartut Aalborgip eqqaani najugallit peqatigiiffimmut ilaasortat amerlanerpaajupput ikittuinnaallu Frederikshavnimeersuullutik. Ilaasortat amerlanerpaat Aalborg Universitetimi, Aalborg Handelsskolemi aammalu Aalborg Tekniske Skolemi atuarput.