Qaammataasap nutaap umiarsuit angallannerat nakkutigissavaa

Qallunaat qaammataasaaraliaat Norgep avannaaniit qullartinneqassaaq. Taanna taamaattut siullersaraat, Kalaallit Nunaannilu umiarsuit angallannerannik nakkutilliissutaasussaalluni.

Qaammataasaq pullartat atorlugit qullartinneqassaaq. Aalborg Universitet taaama ilisimatitsivoq, tassanilu ingeniørinngorniarlutik ilinniartut avataarsuani atortussiannguaq taanna sanasimavaat, soendagsavisen.dk taama allappoq.

Aalborgimi ingeniørinngorniarlutik ilinniartut pingajussaannik qaammataasaliorput. Ukiut pingajussaanni qaaaammataasaaqqanik ilusilersuineq, sananeq malinnaaffiginninnerlu ilinniartunit sammisatut ingerlanneqartarsimagamik.

Jyllandip avannaamiut qaammataasaliaat Sverigep avannaani illoqarfimmit Kirunamiit qullartinneqassaaq. Qaammataasap avataannarsuani inigisassaminiit Sverigep avannaata missaani umiarsuartigut angallanneq nakkutigissavaa. Taannaa taamaattuliat siullersaraat, 700 kilometerinik portussusilimmiittussamik sananissaq anguniarneqarami. 35 kilometerilli atortuutinik misileraanissamut naammakkallarput.

Qaammataasaq Aalborgimeersoq 10 x 10 x 10 centimeterinik angissuseqarpoq.

Qaammataasaq naammassivissoruni umiarsuit kalerrisaarutaat AIS-signalinik taaneqartartut iluaqutigalugit umiarsuit Kalaallit Nunaata eqqaani angallannerannik nakkutilliinermi atorneqarsinnaalissaaq. AIS-it inatsisitigoortumik peqqussutaapput, umiarsuillu anginerusut tamarmik sumiissutsiminnik nalunaartarnerminni atortarpaat. Qaammataasaq Farvandsvæsenet suleqatigalugu aningaasaliisoralugulu ineriartortinneqarsimavoq.

Powered by Labrador CMS