Neriuffimmut milliuunit affaat sinnerlugit

Sapaatiummat katersuisut, ilaatigut Kommuneqarfik Sermersuup borgmesteria, kræftimik akiuiniaqatigiiffimmut Neriuffimmut 590.000 kroninik katersuipput.

Sapaatiummat nunatsinni Neriuffimmut katersuiniarneq 590.000 kronit missiliorlugit pissarsiffiuvoq. Tassalu innuttaasumut ataatsimut 10 kronit sinnerlugit, knr.gl taama allappoq.

– Angusaq nuannaarutigalugulu naammagisimaarparput, suliagut ingerlateqqissinnaanngorlugillu Neriuffimmi suliassagut ingerlassinnaaleratsigit, Kræftimik akiuiniaqatigiiffiup siulittaasua Johanne Olsen oqarpoq.

Katersuiniarnermili angusat siorna angusaniit 100.000 kroninik ikinnerupput.

– Illoqarfiit anginerusut ilaasa siornarniit katersugakinnerusimanerat tassunga pissutaavoq. Illoqarfiilli nunaqarfiillu arlallit angusarissaarnerusimapput. Nuummi siornatuulli angusaqarpugut, tassalu 140.000 kroninik, Johanne Olsen knr.gl-imut unnersiorsimavoq.

Neriuffiup katersuiniarneranut suli tunniussisoqarsinnaavoq - kattuffiup aningaaserivimmi normoraa: Grønlandsbanken 6471 1790584.

Powered by Labrador CMS