Aalborgimi nunarput pillugu saqqummersitsinersuaq
Kalaallit Nunaat Aalborgillu eqqaa niuernermi attaveqatigiilluaqaat. Tamanna Kalaallit Nunaat pillugu saqqummersitsinersuarmi ersersinniarneqartunut ilaapput.
Aalborg Historiske Museum Algademi Aalborgip qeqqarpiaani inissisimasup saqqummersitsineq taasaq "Grønland i Aalborg" ammarpaa.
Borgmester Henning G. Jensen, Aalborg Byråd, Kalaallit Nunaata Aalborgillu imminnut attaveqatigiinnerat taavaa oqaluttuarisaanermi uppernarsaatissaalluartoq ukiut ingerlanerini Kalaallit Nunaannut qanittumik attaveqartuarneq.
Saqqummersitsineq immikkoortunut aggugaavoq, immikkoortut ilaanniippoq Kalaallit Nunaannut umiarsualivimmut tunngasoq, tassanilu takuneqarsinnaavoq Aalborgip Kalaallit Nunaata akunnerminnik arlaleriaqaluni niueqatigiissimanerannut ersiutissat. Saqqummersitap ilaanniipput kalaallit illoqarfimmi najugallit aammalu ilinniagaqartut pillugit saqqummiussat. Kalaallit peqatigiiffiat 45-nik ukiulik Ikinngut taakkulu erinarsoqatigiivi katersugaasivimmi saqqummersitsiviusumi ersarilluarput, ilaatigut erinarsoqatigiit assingi 2,5 meterinik angissusilik takuneqarsinnaavoq siutequtseriarlunilu erinarsortut tusarnaarneqarsinnaapput. Kalaallit Nunaata nuna assingagut isiginnaariat atertik allariarlugu kukkiliseeqqamik ikkussinnaavaat nunatsinni sumiissimanertik paasitikkusukkunikku.
Aalborgimi nunat tamalaat akornanni aalisarnermut tunngasunik takutitsinersuaqarmat Qeqqata kommuniani kommunalbestyrelsemut ilaasortaq Alfred Olsen pisorujussuanngikkaluarluni Kalaallit Nunaata kusanaqqissaamik takutinniarneqarneranik malinnaasinnaavoq.
Saqqummersitsineq ukiup ataatsip iluani takuneqarsinnavoq katersugaasiviullu pisortaa nalunaarpoq nalinginnaasumik saqqummmersitap saqqummersitsinerup nalaanni imaluunniit kinguninnguani saqqummersitaq tikeraarneqartartoq.