Akileraarut allanngussanngilaq

Kommuneqarfik Sermersuumi kommunalbestyrelsi marlunngornermi aappaagumut aningaasanut inatsisissap siullermeerneqarnerani aalajangerpoq kommunimut akileraarutaasartoq 25 procenti nikinnavianngitsoq, taamaasilluni aappaagu akileraarutaasussaq allannguuteqarani 42 procentiuinnassaaq.

Kommunerujussuup politikkeriisa ingerlatsinermut aningaasartuutit taamaaginnartinniassavaat, borgmester Asii Chemnitz Narup, IA oqarpoq. Ilanngullugu naqissuserpaa kommunalbestyrelsemi ilaasortat taanna isumaqatigiissutigigaat.

Aningaasanut pilersaarutip avataatigut 25 million koruuninik atuivallaarsimanerup kingorna atorfinitsitsinissamik unitsitsigallarneq suli atuutissaaq.

AAMMA ATUARUK: Kommunerujussuaq aningaasatigut ajornartorsiortoq

Ineriartortitseqqinnermi pilersaarutinit kommunalbestyrelsip aalajangiussimavaa "Ilaqutariit Illuat" pilersinneqassasoq, taamasilluni inooqatigiinnermut tunngasuni sukkasuumik qanoq iliuuseqapallattoqarsinnaaqqullugu. Illup ilaqutariinnut meerartalinnut ikiorsiinissaq neqeroorutigissavaa.

Tamatuma saniatigut kommunalbestyrelsip sannavik (multiværksted) Tasiilami pilersissavaa, Nuummi inuusuttut suliffissaaleqisut atornikunik iluarsaassillutik suliffimmik sungiusarfiat Piorsaavimmut assingusoq.

Inuussutissarsiorneq piorsarniarlugu Kommuneqarfik Sermersooq nutaaliorfimmik aamma pilersitsiniarpoq.