NUSUKA: Kalaallit sulisinnaasut atorneqarlik
Sulisitsisut kattuffiat isumaqarpoq Nuummi Qinngutsinni inissianik 300-nik nutaanik sanaartornissami nunaqavissut sanaartortinneqartariaqartut.
Nunaqavissut Suliffiutillit Kattuffiata, NUSUKA-p, nuannaarutigaa Blok P Nuummilu inissiarsuit pisoqqat isaterneqartussanngornerat. Paarlattuanik inissiat 300-t nutaat illoqarfiup immikkoortortaasa ilaanni Qinngutsinni sananeqartussanngorneri.
Tamatuma saniatigut suliniaqatigiiffiup mianersoqqussutigaa Qinngutsinni sanaartugassani sanaartorneq tamaat ataatsimut suliarinnittussarsiuunneqarnissaa. Taamaliornikkut illoqarfimmi sanaartornemik suliallit mattunneqassammata, NUSUKA-p erseqqissaatigaa.
– Sanaartugassani sanaartorneq tamaat ataatsimut suliarinnittussarsiuussisarneq inerteqqutaasariaqarpoq, taamaliornikkummi suliffeqarfiit nunanit allaneersut kisimik sanaartorsinnaanermik neqerooruteqarnissaannut periarfissinneqartarmata immalu nunatsinniit suliffeqarfik ataaseq marlulluunnit. Nunatsinni suliffeqarfiit piorsarneqarsinnaanerat periarfissittariaqarpagut, inuiaqatigiinnut tamarmut iluaqqutaassaaq soorlu ilinniagaqarnermut kiisalu aningaasarsiornermut, Gerth B. Lynge NUSUKA-p siulittaasua tusagassiorfinnut allappoq.
Illuatungaannik suliassat suuneri apeqqutaatillugit sanasussarsiuunneqartariaqarput nunaqavissut sulisorineqarnissaannik piumasaqaatitalinnik soorlu ilinniartunik, NUSUKA isumaqarpoq.
– Suliarinnittussarsiortoqartalertariaqarpoq suliassat suuneri apeqqutaatillugit, soorlu suliassat qanoq annertutiginersut nunaqavissunit suliarineqarsinnaanersut paasissutissalerlugit suliassamik tamakkiisumik suliarinnittussarsiuussisoqartillugu, ilanngullugu suliffinnik misiliisut aammalu nunaqavissut qassit atorniarneqarnersut kisitsisilerlugit, Gerth B. Lynge nalunaarpoq.