Air Greenlandip Eurobonus atorunnaarpai
Ukiortaamiit timmisartuutileqatigiiffiup atlantikoq ikaarlugu timmisartuussinermini bonuspointinik katersisitsisarnera atorunnaassaaq.
Januaarip aallaqqaataa 2010 aallartittumik Air Greenlandip timmisartuussinerani EuroBonus-pointinik katersisarneq atorunnaassaaq.
Air Greenlandip qarasaasiatigut atortorissaarutit nutaat billitteqaranilu angalatitsineq 2007-imi atuutilermagit angalasut Air Greenlandip timmisartuussinerani kisimi EuroBonusinik katersisinnaasoqalerpoq. Angalasartulli pointiutitik timmisartuutileqatigiiffik aqqutigalugu angalanissanut nutaanut atorsinnaasimanngilaat.
– SAS EuroBonusimik piginnittoq peqatigalugu teknikkikkut imaluunniit aaqqiissutissanik allamik nassaaniarsimagaluarpugut iluatsinngitsumilli. Taamaammat Air Greenlandip aalajangiuppaa aaqqissuussinermik tassannga aniinnarniarluta, Air Greenlandimit tusagassiutinut pingasunngornermi taama allattoqarpoq.
Ilaasartut 2009-mi decembarip 31-at tikillugu EuroBonusinik katersisinnaapput, pointillu ulloq taanna nallertinnagu katersat ukiup affaani siullermi atorneqarsinnaapput. Illuatungaagut 2010-mi januaarip aallaqqaataata kingorna angalasut pointinik katersisinnaajunnaassapput, siumoortumik angalanissamut inniminniisimagaluaraanniluunniit.
EuroBonusip sullittakkani toqqaannartumik paasissutissiiffigissagai Air Greenlandi nalunaarpoq.