Ilinniartut eqqissisoqarnissaa naatsorsuutigaat
Ilisimatusarfimmi ilinniartut peqatigiiffiat Kisaq neriuppoq sapaatip akunnerata siuliani rektorip Ingerlatsinermut Instituttimik aqutsilernerata kingorna eqqissisoqassasoq.
Ilisimatusarfimmi aqutsinermut instituttimi ilinniartitsinerup pitsaassusaata sapaatit akunnerini arlalinni oqallisigineqareerluni ersarissumik iliuuseqarfigineqalernera, ilinniartut peqatigiiffiata, Kisap nuannaarutigaa, knr.gl allappoq.
Tallimanngornermi paasinarsivoq Ilisimatusarfiup rektoria Tine Pars, aqutsinermut instituttimi studianævni atorunnaarsillugu aqutsisoqatigiinnik pilersitsisoq. Pia Vedel Ankersenip ilinniartitsisutut tunuarnera aallarnerlugu Ingerlatsinermut insituttimi pissutsit pillugit oqallittoqangaatsiarpoq.
ALLLAATIGISAQ ATUARUK: Rektori aquttunngorpoq
– Pissutsit taamaakkallartillugit iluaraakka, ajornartorsiummi suliarineqalermat. Ingerlatsinermut instituttimi ajornartorsiutit tusagassiuutini sammineqarnerat uggornarpoq, Kisap siulittaasua Avijâja Absalonsen oqarpoq
Instituttimi ilinniartitsinerup qaffasissusia oqallinnermi apeqquserneqartut ilagaat. Soorlu ilinniartitaanerup appasippallaamik inissinneqarsimanera aammalu atuagassat taakkuunaaviunerat isornartorsiorneqarlutik.
ALLLAATIGISAQ ATUARUK: Ilisimatusarfik pisoqarfioqisoq isornartorsiorneqarujussuarpoq
Tamannalu aallaavigalugu Ilisimatusarfimmi ilinniartunik oqallitsitsinissaq, Kisamit pilersaarutigineqarpoq. Ilinniarnermut atatillugu ilikkagassatut naatsorsuutigisat ataatsimiinnermi oqaluuserineqassapput.
– Tassami Ilisimatusarfimmi ilinniarnerup pitsaasusaata nunani allani ilisimatusarfinni iliniakkanut assigusunut nallersuunneqarsinnaanissaa ilinniartuusugut tamatta naatsorsuutigigatsigu, Kisap siulittaasua Avijaja Absalonsen oqarpoq.
Kisap ataatsimiisitsinissaa qaqugu pissanersoq, suli aalajangerneqanngilaq.