Missilinut illersuusiorneq allanngorani ingerlaqqissaaq
Naak siulimi Europami missilinut illersuusiap assortuussutaasimaqisut ilaa Barack Obamap unitsissaneraraluarai taamaattoq Pituffimmi radarip piareersarneqarnera ingerlaannarpoq.
Naak USA-p missilinut illersuutip ilai Europamiittut taamaatereeraluarai taamaattoq amerikamiut teknikerit Thulemi radarip illersuutissaanut ilaasussatut piareersarneqarnera ingerlattuarsinnarpaat, Jyllands-Posten allappoq.
– Radareqarfiup Kalaallit Nunaanniittup pitsanngorsaavigineqarnera allanngunngitsumik ingerlanneqartuarpoq, NATO-mi qaffasissumik atorfilik Jyllands-Postimut oqarpoq.
Danmarkip Kalaallit Nunaatalu - ukiuni arlalinni isumaqatigiinniareerlutik - Thulemi radarip missilinut illersuutissamut ilaanissaa 2004-mi amerikamiunut isumaqatigiissutigaat. Isumaqatigiissut taanna suli atuuppoq, massakkullu Thulemi teknikerit suli qarasaasiat softwarellu nutaanik taarsersornerat ulapputigaat.
Pitsanngorsaaneq ukiup naanerani naammassineqassangatinneqarpoq.
Thulemi radarip akeqqat raketiinut, Kangiani Qiterlermeersunut Afrikallu avannaanersunut USA illersortussaavaa.
USA-p erseqqissaatiginikuuaa missilinik Thulemiit igeriussisoqartassanngitsoq. Radari akeqqat missiliinik avataannarsuaniittunik kalerrisaarutaasartussaavoq.
Thulemi sakkutooqarfik, amerikamiut 1953-imi sanalersimasaat, 1961-imiilli USA-p kalerrisaarisarfiinut ilaalerpoq.