ICC-p siulittaasua unioqqutitsinissamik kaammattuivoq

ICC-p siulittaasuata Jimmy Stottsip Alaskami inuit kaammattorpai piniarnermik inuussutissarsiornertik ingerlatiinnaqqallugu, aamma piniarnermut maittarisassanik unioqqutitsissagaluarinilluunniit.

ICC-Kalaallit Nunaata siulittaasua Aqqaluk Lynge, ICC-p siulittaasua Jimmy Stotts AFN-illu siulittaasua Julie Kitka. Foto: Lene Kielsen Holm.

Alaska Federation of Natives, AFN, Alaskap inuiisa kattuffiisa annersaat ulluni makkunani Anchoragemi ataatsimiippoq.

Ataasimiinnermi aamma ICC-ip siulittaasua Jimmy Stotts ICC Kalaallit Nunatalu siulittaasua Aqqaluk Lynge peqataapput, tamarmillu oqaaseqarlutik.

Jimmy Stottsip oqaaseqarnermini Alaskami nunap inoqqaavi kajumissaarpai piniartuunertik ingerlatiinnaqqullugu tamannalu kinguaariinnut tulliuttunut ingerlateqqeqqullugu.

Alaskami piniartarnerup ilarujussua inerteqqutaalersimavoq, taamaakkaluartoq ICC-ip siulittaasua kajumissaarivoq, pinerluttutut naqissusigaanissaq ersissutiginagu piniartuuneq ingerlatiinnarneqaqqullugu.

Aqqaluk Lyngep kattuffiup ICC-tut ittup, avatangiisit illersprneqarnissaannik siunertaqartup pingaaruteqarnera erseqqissaatigaa,. Minnerunngitsumik ukiuni makkunani, Kalaallit Nunaata aningaasaqarnerminik nukittorsaaffigisassaani.

Aqqaluk Lyngellu aamma AFN-imi peqataasunut, ICC-ip Nuummi aappaagu ataatsimeersuartussaanera oqaluttuaraa.

Alaska Federation of Natives Alaskap inuiisa kattuffiisa annersaraat nunaqarfinni illoqarfinnilu 178-ni ilaasortaqartoq.

AFN-ip ataatsimiinnera ugguuna malinnaaffigineqarsinnaavoq http://www.livestream.com/afn2009

Powered by Labrador CMS