Ukiuni 40-ni illoqarfiit suleqatigiittut
5. klassini atuartut Ilulissaneersut ukiut 40-t ingerlaneranni illoqarfittut ikinngutertik Fredericia atuariartorfigisarpaat. Oqaluttuassartaa maanna atuakkiarineqarluni saqqummerpoq.
Inuulluaqqusineq angerlamullu apuunneq ilaatigut qullilinermik kinguneqartarpoq. Inuppassuit inuunerminnik puigussarinngisaminnik misigisaqartarput aammalu inuuneq naallugu ikinngutigiilernermik kinguneqartarpoq Ilulissat Fredericiallu suleqatigiinnerannit aallaaveqartumik.
Illoqarfiit ikinngutigiit ukiut 40-t ingerlanerini suleqatigiinnikuupput 5. klassit Ilulissaneersut Fredericiami qaammatialunni atuartinneqartarlutik.
Ukiut ingerlanerini meeqqat misigisartagaat maanna atuakkami katersorneqarput.
– Atuakkami atuarneqarsinnaavoq illoqarfittut ikinngutigiit marluk suleqatigiilluarnerisa kingunerisai, tassanilu ukiuni 40-ni pisartut oqaluttuassartaat atuarneqarsinnaalluni, Fredericia Kommune allappoq.
– Meeqqat aallartinneqartut siulliit maanna inersimasunngortut oqaluttuaat atuarneqarsinnaapput. Kisiannili 'En enestående historie'-mi aamma atuarneqarsinnaapput suleqatigiinnerup nassatarisaanik ikinngutigiilernerit ullumikkumut suli atasut pillugit oqaluttuat. Atuakkamiipputtaaq politikkikkut aqutsinermi aqqusaakkat nuannersut unamminartullu, ukiunilu 40-ni illoqarfittut ikinngutigiit iluanni pisartut allarpassuit, Jyllandimi kommuneqarfik paasissutissiivoq.
Treldenæs tassaavoq Ilulissani meeqqat Danmarkimik ilikkartagaasa siullerpaartaat, meeqqat Fredericialiartinneqaraangamik atuarfimmi najugaqarfiusumiitinneqaqqaartarput angajoqqaarsiassaminnut pinnginnerminni.
Fredericiamut tikeraartarneq meeqqanut Ilulissaneersut ineriartornerannut sunniuteqartaqaaq - inuttut aammalumi inuiaqatigiinnut. Meeqqat silarsuaat ammartutullusooq ittarpoq periarfissarpassuaqarnertillu takusarpaat, Qaasuitsup Kommuniani borgmesterip tullia Bent Broberg Kristiansen, IA, oqarpoq.
Atuagaq 1.000-inngorlugu naqinneqarpoq.
– 'En enestående historie'-p, takutippaa suliniut taamaattoq taama torrallataatigisumik piviusunngortinneqarsinnaasimanavianngitsoq angajoqqaarsiaasartunik peqanngikkaluarpat. Taakkoqanngikkaluarpat tikeraartoqartarsimanavianngikkaluarpoq. Angerlarsimaffitik ammartarpaat meeqqallu kalaallit tikilluaqqungaartarlugit. Atuagaq taanna angajoqqaarsiaasartunut pigitinneqarpoq, John Bech Hansen, Fredericiami grønlandsudvalgimi siulittaasuusoq oqarpoq.
Atuakkamik saqqummersitsineq tallimanngornermi Fredericiami kommunip ataatsimiittarfiani malunnartinneqarpoq Kommuneqarfik Sermersuumit aamma peqataaffigineqarluni.