Qaleralittassat 1000 tonsinik ilaneqarput
Upernavik aamma Uummannaq tamarmik immikkut 500 tonsinik qaleralittassinneqaqqipput.
Aalisarnermut naalakkersuisoq Ane Hansen, Inuit Ataqatigiit, nalunaarpoq Upernavimmi qaleralittassat 500 tonsinik amerlineqartut taamatuttaaq Uummannami qaleralittassiissutaasut 500 tonsimik amerlineqartut, ataasinngornermi oktobarip 26-annit atuutilersumik.
Pisassanik qaffaannermut piumasaqaataavoq maannamut qassutinik qalluineq ingerlanneqartoq pilersaarutit malillugit ingerlanneqassammat naannassineqarnissaata tungaanut.
Ane Hansenip ilanngullugu nalunaarutigaa piumasaqaataasoq siunissami qassutikunik qalluineq ukiut tamaasa ingerlanneqartassasoq.
Naalakkersuisut erseqqissaatigaat pisassiissutinik qaffaaneq immikkut ittumik qaffaanerusoq ilimagineqassasorlu immikkut pisassiissutit aalajangikkat nutaat ukiup naanissaanut allannguuteqartinneqassanngitsut.
Naalakkersuisut pingaartippaat qaleralinniarneq peqassutsimut nungusaataanngitsoq, taamaammallu pingaartillugu aalisartut paasissagaat pisassiissutitut aalajangikkat aalajangiusimaneqassasut.