SMS akeqanngitsoq matuvoq
Tele Greenlandip ukiuni kingullerni nittartakkamigut SMS-imik akeqanngitsumik atuisartuminut atugassaqartitsivoq. Akerartuisarnerilli pissutigalugit Telep kiffartuussinini matuinnartariaqalerpaa.
Sullissineq taanna nuannarineqartorujussuugaluarpoq, Telellumi ajuusaarutigaa matuinnartariaqaramiuk.
- Piffissami sivisuumi sullissiviup atornerlunneqarneranik maalaarfigineqartarsimavugut, atuisartut akeqanngitsumik sullissivitsigut SMS-ikkut uumisaarneqartarlutik - uagullu tamakkuninnga nassiussisut kinaassusersinnaasimanngilagut, Tele tusagassiorfinnut nalunaarummini allappoq.
Siusinnerusukkut atornerluinermik akerartuinermillu maalaaruteqartut ikittuinnaasimapput, qaammatilli kingulliit arfinillit ingerlanerini sms-ikkut uumasaarinerit amerleriarujussuarsimapput.
- Tamassuma unitsinnissaanut maannangaaq periarfissatuaraarput SMS-imik akeqanngitsumik sullissinitta matunissaa. Telep isumaliutiginiarpaa siunissami SMS-imik periarfissat, atuisartunik atornerluinermut uumisaarinermullu pinngitsoortitsisinnaasut.
Telep akeqanngitsumik SMS-imik sullissinera ataasinngornermi oktobarip 26-ianni atorunnaassaaq.