Qimmit toqunneqartut ulorianartuusimapput
Qimmit, ilaqutariit qimmiannik saassussisut Amstaff-imik raceqarsimapput, siusinnerusukkullu qimminik allanik saassussisimallutik. Kalaallit Nunaanni Uumasut Ikinngutaasa qimminik Kalaallit Nunaannut eqqussuineq pillugu aalajangersakkat iluarsaanneqaqquvai.
Qimmit saassussisut Amstaff-imik (Amerikansk Stafforshire Terrier) raceqarsimapput, "qimmillu qaasuttuullutik" Rottweilerimit allaanerusut.
- Qimmit Qapiarfiusaami najugaqarsimapput piffissami sivisuumi, ullullu tamaasa takusarsimavagut, aammalu pisimasup pinissaa ersissutigisimavarput. Piffissaq apeqqutaaginnarsimavoq, tassami qimmit taakkua marluk siusinnerusukkut qimmit sunngitsut saassuttarsimavaat, Susanne Markdal, Kalaallit Nunaanni Uumasut Ikinngutaanneersoq oqarpoq, nassuiaallunilu race Amstaff qimmiusoq paasiuminaatsorujussuarmik tarnilik.
- Qimmit allat timaasa pissusilersornerat paasisinnaanngiaq, taamaasillutilu qimmit pisarnerannut "maniguutiinnartaratik", taakkua paasitillugit "taakkua naalagaasut". Amstaff "qimmeq ulorianartuuvoq" Kalaallit Nunaannullu eqqunneqartariaqarani. Tamannalumi pillugu oqartussaasut allaffigisimavakka, neriuutigalugu Kalaallit Nunaannut qimmik eqqussinermut aalajangersakkat iluarsaanneqarumaartut, Susanne Markdal oqarpoq.
Susanne Markdalip erseqqissarusuppaa Amstaffit ajortisaarfiginiarnagit, pissutsilli tikkuaannarlugit.
- Uumasunik nuannarinnittutut qimmit tamaasa nuannaraakka, allaat Amstaffit qimmit nuannersuusinnaapput, niaqquini sumik pisoqarnissaasa tungaanut. Danmarkimi qimmit pissusaannik ilisimatuut race taanna pillugu taamatorpiaq oqarput. Tassa qimmit ulorianartuusut. Qanorlu perorsartigigaluarukkit aammalu qanoq aqussinnaatigigaluarukkit, siumut isigisinnaanngilat qarasamikkut "kortslutternissaat". Taavalu qanoq iliortoqarsinnaanngilaq. Qimmit qaasuttut qulit susinnaanngilaalluunniit, Susanne Markdal oqarpoq.
- Ernumassutigaaralu "qimmit qaasuttut tamakkua genii" Nuup qiimmiinut akulerunnissaat - ajortorujussuussagaluarpoq.
Naalakkersuisut qallunaat naalakkersuisui utaqqiniarpaat
Inatsisartunut ilaasortaq Justus Hansen, Demokraatineersoq, Inuussutissarsiornermut Aatsitassanullu Naalakkersuisumut §36-imik apeqqummini aperivoq meeqqat qimminut qaasuttunut, silaarullutik kamattartunut, meeqqat illersorniarlugit Naalakkersuisut qanoq iliuuseqarniarnersut.
"Demokraatit qimmit qaasuttut isigaat inuiaqatigiit inuulluarnissaannut ajornartorsiutaasinnaasutut, taamaattumillu isumaqarpugut Naalakkersuisut ingerlaannaq iliuuseqartariaqartut, innuttaasut - pingaartumillu meeqqat - qimminut taamaattunut illersorniarlugit.
"Malittarisassat sakkortuujunerat Demokraatit toqqissisimanartoqartikkaluarpaat, piumaneruvarpulli qimmit taamaattut Kalaallit Nunaanni pigineqannginnissaat aamma/imaluunniit eqqunneqannginnissaat".
Inuussutissarsiornermut Aatsitassanullu Naalakkersuisoq Ove Karl Berthelsen, Justus Hansenimut akissummini allappoq, rottweilerit qimmitut qaasuttutut kisiartaalluni Kalaallit Nunaanni inunnik uumasunilluunniit ajoqusiisumik pisuni akuusarsimasoq, qallunaallu tusagassiorfiini allaaserineqartutut pisarsimasut taamatut amerlatiginngitsut.
- Isumaqarpunga Kalaallit Nunaanni qimmit angalaaginnartut qimminit qaasuttunit ajornartorsiutaanerusut. Oqaatigisattullu qimmit pituutaqarnissaannik inatsiseqarpugut, tamannalu politiit qimminillu isumaginnittartut atuutsittussaavaat. Taamaakkaluartoq siunertaraara Danmarkimi oqallinnerup maanna ingerlasup inernissaa aammalu qallunaat naalakkersuisuisa tamatumani nutaamik inatsisiliornissaat, qallunaat naalakkersuisuisa nalunaarutigisimallugu inatsit taanna qimminut qaasuttunut inerteqquteqarnermi pitsaasumik atuutsinneqarnissaa qulakkeermiarlugu, Ove Karl Berthelsen Justus Hansenimut akissummini allappoq.