Puisit nungutaasinnaasut satellitikkut malittaraat
Ilisimatuut arlallit Pinngortitaleriffimmeersut Danmarks Miljøundersøgelsemeersullu qasigissanik arfineq pingasunik, ussummik ataatsimik natsermillu Nunap Isuata qanittuani iluatsittumik satellitsikkoortumik aallakaatitsissusiipput.
Nassitsissutit puisit ingerlaasiannik aqqaamasarnerannillu paasissutissanik satellitsikkoortumik ilisimatuut allaffiinut nassitsiuartussaapput. Kalaallit Nunaanni qasigissanik ussummillu satellitsikkoortumik aatsaat pernaammik aallakaatitsissusiisoqarpoq, Pinngortitaleriffik allappoq
Kalaallit Nunaata qasigiaa nungutaanissaminut "aarlerinartorsiortutut" nalilersugaavoq, ussulli nalunaarsimalluni ”paasissutissanik peqanngimmat qanoq innerat naliliiffigineqarsinnaanngitsoq”.
- ”Pingaarluinnartuuvoq paasiniassallugu qasigissat sumiittarnersut sumilu neriniartarnersut. Kalaallit Nunaanni qasigiaq 1960-ikkunni 1970-ikkunnilu ikileriareersimasoqaaq, tamatumalu kingornagut qaqutigoortorujussuanngorluni" Aqqalu Rosing-Asvid oqarpoq.
Pinngortitaleriffiup ukiorpassuanngortuni eqqissisitaanissaa inassutigisarsimavaa, aammalu North Atlantic Marine Mammal Commission (NAMMCO), qasigiaq Kalaallit Nunaanni nunguinnassanngippat piniarneqarnera unitsinneqassasoq inassuteqarpoq. Qasigiaq Kitaani ima qaqutigoortigilerpoq qaqutigut ataasiakkaannguit takuneqartarlutik.
Kalaallit Nunaata kujaterpiaani suli peqalaarpoq, takunnittarnerilli arlallit pasinartippaa taakuttaaq ukiuni kingullerni assut ikilisimasiut. Tassalu qasigiaqatigiit taakkorpiaat misissuinermi uani nutaami qitiutinneqarput.
Puisit aallakaatitsissutinik marlunnik atortulerneqarput. Aappaa amianut nipititaavoq aappaalu seqquata aappaanut ”iverutitut” tassiliunneqarsimalluni nigaliussimalluni.
Qasigissat aallakaatitsissuserneqartut tamarmik inersimasuupput. Taakua puisit eqqissisimatinneqartarput 1. majimiit 1. oktobarimut, piniartulli aallaaniartartullu kinnuigineqarput puisit taamatut atortulikkat issunnaveersaaqqullugit oktoberi aallartereeraluarpalluunniit, taakkuami paasissutissanik ilisimatuunut nassiussuiniassammata.
Satellitsikkoortumik malittarinninneq Aqqalu Rosing-Asvid-imit, Pinngortitaleriffimmeersumit, aqunneqarpoq aammalu misissuillunilu suliaq taanna Aatsitassanut Pisortaqarfiup Nunap Isuata eqqaani uuliasiortoqalissagaluarpat, sunniutigiumaagaanik nalilersuinermi atugassanik misissuinissanut arlalinnut imissutigisimasaanut ilaavoq.