KNR-mi tusagassiortoq Prix Europamut innersuunneqartoq
Henriette Rasmussenip piviusut tunngavigalugit radiokkut aallakaatitassiaa - Angutit iloqqasut - nunat 40-neersut ilanngussaqartut akornannit toqqarneqarluni Europami tusagassiornermik festivaleqartitsinermut nersornaasigassatut innersuunneqarpoq.
KNR-imi tusagassiortup Europami tusagassiornermik festivaleqarnermi naliliisussanik naalaartitsilluarpoq. KNR Radio KU-meersoq Henriette Rasmussen Prix Europamut akissarsisinneqartussatut innersuunneqarpoq piviusut tunngavigalugit aallakaatitassiaanut Angutit iloqqasut pillugu, aasaq manna aallakaatinneqartoq, taamatut allappoq knr.gl.
Aallakaatitami angutit arlaqartut Nuummi aqqusinermi ingerlaarujoornerini ernummatigisartagaat inuunerminni ajornartorsiutit aqqusaartagaat arnallu pillugit ajornartiorsiutigisartagaat aallaavigineqarput.
Henriette Rasmussenip radiukkut aallakaatitassiaa, Europami nunat assigiinngitsut 40-t aallakaatitassiaasa akornanni torrallataanerpaatut innersuunneqartunut ilannguppoq. Allat aallakaatitassiat 231-t peqatigalugit ajugaaniutivinneq Berlinimi oktoberip 17-ianiit 24-ata tungaanut ingerlanneqassaaq. Henriette Rasmussen radiukkut aallaakaatitassiorneq pillugu ukioq ataaseq affarlu ilinniaqqippoq, ilinniaqqinnerit Islandimi Kalaallit Nunaanni Danmarkimilu ingerlanneqarlutik. Ilinniaqqinnerit Islandimi filmiliornermik ilinniarfimmit Islands Filmskolemit Ilisimatusarfimmillu aaqqissorneqarlutik.