Oqaluttuarisaanermi qanoq pisoqarsimanera qulaarli
Nassuerutiginninneq, akuerininneq aamma ataqqinninninneq - imaluunniit utoqqatsernerinnannguaq. Pingasunngormat unnukkut Ilimmarfimmi tusarnaartut piumasaqaatigaat oqaluttuarisaanermi 50-ikkunni aamma 60-ikkunni pisimasut saqqummiunneqartariaqartut.
Pingasunngormat unnukkut Ilimmarfimmi inissat ikittuinnaat kiserngorupput, tamaani atuakkiortoq aamma inunnik isumaginninnermik siunnersorti Tine Bryld atuakkiami kingulliit ilaat "I den bedste mening" (kalaallisut "Ajunnginnerpaamik isumaqarluta") oqaluttuarivaa, tassani pineqarput meeqqanit katillugit 1600-juusunit aallartitaasimasunit siulliit, taakku Danmarkimut aallartinneqarput danskisut ilinniarniassammata. Kisianni aamma atuagaq oqaluttuaraa, meeqqat 100-t missaanniittut tassanngaannaq meeravissianngortinneqarnerat, Kalaallit Nunaanni meeqqat angerlarsimaffiisa ulikkaarnerat pissutaalluni:
- Meeqqat marluk sinnerlugit ukiullit tamarmik meeravissianngortinneqarput, Tine Bryld oqalinnissamut aallarniinermini oqaluttuarpoq:
- Pineqartunut tamanut pingaaruteqarpoq sooq taamak pisoqarsimanersoq akissutisissallugu. Siumut imarsiorluta ingerlaniarta, kisianni qanga pisimasut nassataralugit, naqissusiivoq.
Oqariartuut, tamatuma kingorna oqallinnermi ingerlaqqittoq:
- Uanga naluara utoqqatsernissaq pisariaqarnersoq. Uanga angorusunneruvara qanoq pisoqarsimanerata paasineqarnissaa. Allattugaatit tamanut ammarneqartariaqarput, taamaalilluni oqaluttuarisaaneq paasineqarniassammat. Uanga statsministerit arlaannik utoqatserfigineqarnissaq pisariaqartinngilara. Uanga piumasaraara oqaluttuarisaanerup danskit aamma kalaallit tungaanniit nassuerutigineqarnissaa. Ataatsimoorluta oqaluttuarisaanerput assigiimmik paasisariaqarparput. Uagut ajortuliorfigineqarsimasutut uninngaannarnata, kisianni oqaluttuarisaaneq ilisimalerniartigu, tusarnaartut ilaat meeraanermini Røde Kors Børnehjemimi ukioq ataaseq najugaqarsimasoq oqarpoq.
Arnap allap angani oqaluttuaraa, taakku 1600-t Danmarkimut nassiunneqartut akornanniissimasoq, uteramilu naqinnernik ilisarinnissinnaajunnaarsimasoq:
- Uagut arlaannik pisariaqartitaqarpugut, inunnik taamatut qimagutsinneqarlutik misigisaqarsimasunik, taamatullu misigisaqarnerminni kingunerlutitsisimasunik inissiinissamut ikiuisinnaasumik, arnaq oqarpoq naqissuserlugulu qanga pisimasunut suulluunniit paqumigisaqartoqassanngitsoq:
- Uagut sorlavut ilisimasaqarfigisariaqarpagut, oqarpoq.
Angutip inersuarmi tusarnaartut ilaata aammattaaq assut eqqumigaa, sooq qallunaat arlaannaataluunniit nassuerutigerusunnginneraa, Kalaallit Nunaat 40-kkunniit 60-ikkut ilanngullugit qanoq pineqarsimanera, soorlu taamaannersoq Tine Bryldimut apeqqutigalugu.
- Uanga soorunami danskit naalakkersuisui sinnerlugit akissuteqarsinnaanngilanga. Kisianni uanga isumaqarpunga uggornartoq, danskit naalakkersuisa oqaluttuarisaanermik qulaajaanissamut inissaqartitsinnginnerat. Minnerpaamik Kalaallit Nunaanniit piumasarineqartariaqarpoq, suut tamarmik katersorneqarnissaat tamakkulu allaaserineqarnissaat. Taamaaliornikkut oqaluttuarisaaneq qulaajarneqassaaq, pisimasullu kingunerisimasaat ilinniarfigineqassapput, Tine Bryld, tallimanngornerup tungaanut Nunatsinniittussaq, akissuteqarpoq.
Sermitsiaq normu 38 atuaqqigit, Tine Bryldip Nuummi Røde Kors Børnehjemimut pulaarneranit.