TV-mi usuup puuinik ussassaarinerit eqqorniakkanik uniorput

Usuup puuisat atorneqarnerunissaannik takoqqusaarut eqqorniakkatik sanioqquppaat. Ussassaarut pikkunaappoq qanganisarpalullunilu inuusuttuaqqat naliliipput.

- Ussassaarutip oqaatigissagaluarpaa hiv aamma aids toqussutaasinnaasut inuuinnarusukkaannilu usuup puuanik atortarnissaq eqqaamasariaqartoq, tusagassiortunngorniat knr.gl-imut oqarput. Paarisap ussassaarusiaa maanna KNR TV-kkut ussassaarinerani takuneqarsinnaavoq. Assi: Lasse Kristensen, Polfoto.

Louis Sigurdsen aammna Melissa Geisler, tamarmik tusagassiortunngorniat Paarisap TV-kkut takoqqusaarusia pikkunaagaat qanganisarpalugalugillu, knr.gl allappoq.

- llut ujaqqanit issunillu illuliat najugaqarfigisimanngisaannarpavut, kamiillu nalliuttorsiornerni aatsaat atorneqartarput, taamaattumik usuup puuinik atuinissamik TV-kkut takoqqusaarut, atuilernissamik inuusuttunut oqariartuuteqanngilaq.

- Assut pikkunaagivakka aamma tupatsinneqartutut misigisimanngilanga. Isumaqarpunga taama ittunik takoqqusaarusiussagaanni tupannartuusariaqartoq, taama oqarpoq Melissa Geisler, Tusagassiornermi Ilinniarfimmi ilinniartoq.

Ilinniartoqataata Louis Sigurdsenip takoqqusaarutip oqariartuutaa inuusuttunut tulluartuutinngilaa:

- Isumaqarpunga takoqqusaarutit takutissallugit sakkukippallaartut. Takoqqusaarummi inuit nuannaarpasittorujussuit takutinneqarput, naak nuanninngitsumik kinguneqartartoq.

Usuup puua atunngikkaanni toqussutigineqarsinnaanera tv-kkut takoqqusaarummi ersersinneqarsinnaagaluartoq, Louis Sigurdsen isumaqarpoq.

Paarisap ussassaarutaa KNR TV-mi massakkut sarsuatinneqartarpoq. Ussassaarutit assigiinngitsut pingasuupput Ice Mediamit suliarineqarlutik.

Powered by Labrador CMS