Efterskolertut atualerput
Kangerlussuaq Efterskole 79-inik atuartoqarluni aallartippoq.
Ulluni tulliuttuni Kangerlussuaq Efterskolimi atuartut ukiup ingerlanissaanik ilisimatinneqassapput, tamatumalu kingorna atuartunut 79-inut efterkolimi ukioq atuarfik iluamik aallartissaaq.
- Isumaqarpunga atuartut Kangerlussuarmi ukiumi atuarnerminni nuannisarumaartut. Atuarfiup aallarteqqinnissaanut sivikitsuinnarmik piffissaqarsimagaluarluta tamanna iluatsissimavoq, nunaqarfimmiullu ikiuillutillu ilakkuminartuusimapput. Atuarfiup sulisui angumersiniaallutik ulapissimaqaat, maannalu tamatta atuartut misigisaqartinnissaannut, efterskolip kisimi tunniussinnaasaanut, piareersimavugut, Kangerlussuup Efterskoliani forstanderi Flemming Cederholm oqarpoq.
Kangerlussuaq Efterskole atuarfimmi faginik piareersaataasunik neqerooruteqarpoq, liniefagit tallimat saniatigut, Silamiinneq, Isiginnaartitsineq, Nipilersorneq, Sannavik Isumassarsiorfik aamma Timersorneq.