Professori: Kalaallit Nunaat utoqqatserfigisiuk
Inuup ineriartorneranik ilisimatusaatini professori isumaqarpoq, 1950-ikkut aamma 60-ikkut ingerlanerini pisimasut nuanninngitsut arlallit pillugit Danmarkip Kalaallit Nunaat utoqqatserfigisariaqaraa.
Kalaallit Nunaata aamma Danmarkip akornanni oqaluttuarisaanermi pisimasut nuanniitsut qaangerneqartariaqarput, Naalakkersuisut Siulittaasuat Kuupik Kleist isumaqarpoq, ullumikkut Danmarkimut aallartoq ilaatigut statsaminister Lars Løkke Rasmussen ataatsimeeqatiginiarlugu.
Piffissap ingerlanerani Danmarkip tungaaniit Kalaallit Nunaannut kusanaatsuliorsimanerit kusanartumik naammassineqartariartut, Kuupik Kleistip kissaatigaa
Assersuutissat ilagaat 1950-ikkunni misileraaneq, taamanikkut kalaallit meeqqat 22-t Danmarkimi ilaqutariinni meerarsiassanngorlugit pinngitsaaliissummik aallartinneqarput ilaquttaminnullu uteqqinngisaannarlutik, knr.gl allaaserisaqarpoq.
Københavnip Universitettiani inuup ineriartorneranik ilisimatusaatini professorip, Jens Dahl qularuteqanngilaq. 1950-ikkut aamma 60-ikkut ingerlanerini pisimasut nuanninngitsut arlallit pillugit Danmarkip Kalaallit Nunaat utoqqatserfigisariaqarpaa.
- Kalaallit Nunaannut utoqatserneq danskit tungaanniit iliuusaassaaq ersiutaasoq, kisianni aamma malugitinneqassaaq danskit tungaanniit oqaluttuarisaanermi pisimasunut aamma Kalaallit Nunaanni inuttaasunik erloqisitsisimanermut akisussaasuusimanermik takutitsineq. Tamatumunnga ilutigitillugu aammattaa tamanna namminersornermut nutaajusumut ataqqinninnermik takutitsinerussalluni, tassalu danskit aamma kalaallit akornanni oqaluttuarisaanermi aallarniineq nutaaq ersersillugu, Københavnip Universitetiani Inuup ineriartorneranik ilisimatusaatini professori Jens Dahl Radioaviisimut oqarpoq.