Ipisoqarnerata kingorna umiarsuaatileqatigiiffik eqqartuussivimmut tunniuppaat

Umiarsuarmi Orasilami inuttaasup ajunaartup angutaa taarsiivigineqarnissamik piumasaqarpoq.

Ernst Sørensen, 47-nik ukiullip Michael Kryger Sørensenip angutaa, qulanngilliuinnarpoq: Svendborgimi umiarsuaatileqatigiiffiik M. H. Simonsen ernermi toquneranut akisussaatinneqartariaqartoq.

Ag.gl taama allappoq.

Michaelikkut umiartortoqataalu 18-inik ukiulik Jon Sandholdt januaarimi umiarsuarmit Orasilamiit nunaqarfimmut Saarlumut Qaqortup Narsallu akornanniittumut orsussap slangianik unnukkut taartumi ikaassiniartillutik umiatsiaaqqamik kinngullutik ajunaarput.

Ernst Sørensenip advokatini Århusimiittoq qinnuigisimavaa umiarsuaatileqatigiiffiup eqqartuussassanngortinnissaanut suliassaq piareersaqqullugu, ajunaarnermut atatillugu akisussaassuseqannitsumik iliortoqarsimammat.

– Neriuppunga Michaelip erneri marluk taarsiiffigineqarumaartut, anaanartik ilagalugu illuminniiginnarsinnaaniassagamik, Ernst Sørensen Fyens Stiftstidendemut oqarpoq.

Umiarsuaatileqatigiiffik sakkortuumik pisuutinneqarpoq. Umiartortut ajunaartut arlannaalluunniit annanniummik aatsoqarsimanngilaq. Atallaarsuillu annanniutit atisimasaat angivallaarujussuarsimapput.

Umiarsuup inuttai Søfartsstyrelsimut nassuiaasimapput, umiarsuaatileqatigiiffik Sørensen atallaanik naleqquttunik angissusilinnik qinnuigisinnaasimanngikkitsik, nalunnginnamikku naaggaarneqassallutik. Umiarsuaatileqatigiiffiulli tamanna assortorpaa.

Søfartsstyrelsep ajunaarnermut pituttarfiup svejsikkap illuarsimanera ajunaarnermut peqqutaasimanerarpaa. Aammalu Orasila umiatsiaararlu sulinerup nalaani imminnut atassutaaruttoorsimallutik. Ajunaarnerup kingorna aatsaat paasinarsivoq, Orasilap qullersua imaanut nakkartoqartillugu kalerrisaarutaasartoq taartumi atorsinnaasimanngitsoq.

Ernst Sørensenip qularinngilluinnarpaa ernini pisinnaasani tamakkerlugu annanniaraluarsimassasoq. Michael Kryger Sørensen nallorilluinartuuvoq.

Nunamiit 30-40 meterinik ungasitsigisumi imaanut nakkaramik gummersuani peersimagaluarpai. Ujaqqalli quasangaarmata nunamut qaqisinnaasimanngilaq, angutaa taama eqqarsarpoq.

Powered by Labrador CMS