Kommuni Bornholmimut paasisassarsiortoq
Qeqqata Kommunia sulisumik Bornholmiliartitsivoq Danmarkimi kommunit kattussortinneqarsimanerat pillugu misilittakkanik qaammatit pingasut ingerlaneranni paasisassarsiortussamik.
Danmarkimi Kalaallit Nunaannilu kommunit kattussortinneqarnerini misilittakkat imaalinnarlugit imminnut sanilliukkuminaassinnaapput. Taamaakkaluattorli ilaatigut pilersaarusiornermut allaffissornermillu aqutsinermut tunngasut ilinniarfigeqatigiinneqarsinnaapput. Qeqqata Kommuniani atorfilik Mads Pihl qaammatini tulliuttuni pingasuni Bornholmimiittussaq oqarpoq.
– Uanga kommunerinukuusara aamma kattuteqataanikuuvoq. Taamaattumik Qeqqata Kommunia aamma Bornholmimut assinguvoq, Mads Pihl Bornholmimi TV2-mut oqarpoq.
– Kalaallit Nunaannili sumiiffiit imminnut ungasissorujussuummata Kalaallit Nunaani atorsinnaasut ilaat allani atorsinnaanngillat.
– Soorlu assersuutigalugu uagut atuarfinnik matusiinnarsinnaanngilagut. Meeqqat illoqarfimminni atuarfissaarunneqarsinnaanngillat. Aqqusineqanngimmat, Mads Phil Bornholmi peroriartorsimasoq oqarpoq.