Kalaallit ikioruminaapput
Aalborg Kommunimili suleqatigiit immikkut sammisaqartinneqartut kalaallit isumaginninnikkut atugarliortut tikissinnaalersimavaat ikiorneqarsinnaalersillugit. Amerlaqisut imigassamik hashimillu atuinernik annikillisissimavaat.
Inuit kiserliortut imerajuttut amerlanersaat akuersaartarput Aalborg Kommunip assigiinngitsunik katsorsarneqarnissamik neqeroorfigigaangatik. Tassa kalaalliunngikkunik.
Immaqa neqeroorfigineqarnertik qujaruttaraluarpaat, tamannali pisarpoq inussiarnerniaannarluni. Amerlaqisut katsorsarneqarnissamik neqeroorutit sukkasuumik tunuttarpaat - imaluunniit takkutinngitsuuittarlutik, taamatut allappoq nordjyske.dk.
Kommunimi suleqatigiit immikkut sammisaqartinneqartut naammagisimaarluinnarpaat kalaalerpassuit qanoq amerlatigisut ikiorneqartarsimanerat, ukiuni suleqatigiit atuunneranni.
Peqataasunit 23-init marluk ikiaroortarunnaavillutillu imertarunnaavissimapput. Siusinnerusukkut angerlarsimaffeqanngitsoq ataaseq initaarsimavoq, ataasiakkaat ingerlatsivimmi praktikkernermi peqataasimapput, suleqatigiillu malillugit amerlasuut imigassartornertik hashitornertillu annertuumik annikillisissimavaat.
23-it tamarmik ukiorpassuarni atornerluisuusimapput. Suliniut Velfærdsministeriamit tapiiffigineqarpoq, taanna paasissutissanik katersiniarluni qanoq pitsaanerpaamik kalaallit atugarliortut ikiorneqarsinnaanersut.
Inuunermi misilittakkat iluaqutigaat
Mianersortumik naliliinermi manna tikillugu peqataasut inuunermi misilittakkatik imminnut iluaqutigilluarpaat. Aalborg Kommunemi atornerluinermut immikkoortoqarfimmi pisortaq Christen Bisgaard naapertorlugu taamaasillutik pitsaasunik misigisaqarsinnaasarput.
- Imaassinnaalluarpoq atugarliornertik pissutigalugu imminnut isiginerluttut. Misigigaangamikluli allat aamma taamaattut imminnut ikiorsinnaanerulersarput. Misigisaq amerlasuut ilisarissavaat. Inunnulli tamakkununnga misigisap tamassuma angunissaa ajornakusoorsinnaasarpoq.
- Amerlasuut misigissutsitik oqaatigiuminaatsittarpaat. Tamakkualu tassaasarput oqaatsitigut sanngiinnerit, Christen Bisgaard oqarpoq.
Atornerluisut nalinginnaasumik pingasoriarluni socialrådgiverimik oqaloqatiginninnissamik neqeroorfigineqartarput, taassumalu arlaatigut katsorsarneqarnissaa inassutigisarpaa.
- Ikiorsiinerilli tamakkua inunnut taakkununnga immikkut iluaqutaasimanngilaq. Soqutiginninngillat, Christen Bisgaard oqaluttuarpoq.
Isumassuinermut piffissaq annertunerusoq atorneqarpat, kalaaliinnarnut gruppilesorluni, anguniakkat soqutigisaat annertusiartussapput.
Saqqumilaarneq iluaqutaavoq
Atugarliortunut Suleqatigiinni sisamaasuni piffissaq ilaatigut atorneqartarpoq kalaallinut, ikiorneqarnissamik atorfissaqartitsisinnaasunut orniguttarneq. Tamakkuami nammineq ikiortissarsiorneq ajorput.
- Sisamanut taakkununnga pineqarpoq orniguttarneq tikinneqarsinnaanerlu. Illoqarfimmi ilisarisimalerneqarneq, Christen Bisgaard itisilerivoq.
Atugarliortunut suleqatigiit assersuutigalugu peqataasut atornerluiunnaarniarnerannik ikiortarpaat, ulluinnarni inuunerat aaqqinniarlugu, isumaginninnikkut attaveqalersillugit immaqaluunniit sulisartoqarfimmut isertillugit.