Kollegialiornerit annertusarneqalerput
Nuummi kollegiami inissat nutaat 200-t kollegiami inissaaleqinermik annikillisaassapput, tamannalu peqatigalugu suleqatigiissitaliap sulinasuartussap kollegianik aqutsineq eqaannerusoq nassaariniassavaa.
Inuusuttut ameranerujartortut ilinniagaqarnissaq tunulliutiinnartalerpaat, pissutigalugu Nuummi kollegiani inissaaleqineq. Pissutsit tamakkua Naalakkersuisut naammaginngilat, taamaattumillu 2013-ip tungaanut Nuummi kollegialiorneq annertusarniarpaat, kollegiami inissanik nutaanik 150-200-nik.
Taamatut paasissutissiivoq Naalakkersuisunut ilaasortaq Mimi Karlsen, Inatsisartunut ilaasortamut Aleqa Hammondimut (S) akissuteqarnermini.
Ukiuni tulliuttuni pingasuni kollegialiornernut 66 millioner koruunit atorneqassapput.
Naalakkersuisut aamma nassuerutigaat inuusuttorpaaluit ilinniagaqarnissaq taamaatiinnartaraat, pissutigalugu kollegiami inissat piareersimanissaannut piffissaq sivisuallaartoq ingerlasarmat, pissutsillu tamakkua Naalakkersuisut sukkanerpaamik aaqqinniarpaat, Mimi Karlsen paasissutissiivoq.
Tassami suligasuartussamik suleqatigiissitaliortoqarsimavoq, taassumalu septembarip naannginnerani kollegianik pitsaanerusumik sukkanerusumillu ingerlatsinermut aaqqiissutissanik saqqummiussissaaq.
- Naatsorsuutigineqarpoq suliaq kinguneqassasoq kollegiami inissamik tunniussisarnerup pitsaanerulernera, kiisalu assersuutigalugu aserfallatsaaliinerit iluarsaassinerillu, najugaqartunik nakkutilliineq, ingerlatsineq, kollegiat ingerlannerat pitsaanerusut, il.il., Mimi Karlsen allappoq.