Sulisut soraarsinneqassapput
Upernavik Seafoodip soraarsitsinissaq ilimasaarutigaa qaleralinniarnerup Naalakkersuisunit unitsinneqarnerata kingorna.
Annonse
Sapaatip akunnerani tullermi, oktobarip 9-anni, Upernaviup eqqaani qaleralinniarneq unitsinneqassaaq.
Upernavik Seafoodimut tamanna kinguneqassaaq suliffissuarmi sulisut selskabip tunisassiorfiani sapaatip akunnera 42-miit suliassaarunnissaat, tassa qalerallit tamarmik taamaasinerani tunisassiarineqariissammata umiarsuarmillu aallarunneqariissallutik.
Tamatuma kingorna Upernavik Seafoodip naatsorsuutigaa sulisut angerlartinneqassasut, taamaasilluni ataasinngornermi oktobarip 19-ianniit suliffissaarutissallutik.
Selskabip pisortaanerata Flemming Andersenip tusagassiorfinnut nalunaarutaa malillugu Upernavik Seafood septembarimi 210-t missaannik sulisoqarsimavoq.