Qassutaarsiutinik qallorneqartussanngorput
Qaleralinniutit immap naqqaniittut piiaqquneqarput aalisakkanik napitiffigineqartuarnerat ilaatigut pinngitsoorniarlugu.
Uummannami Upernavimmilu qaleralittassat nunguerput, tamannalu iluatsillugu aalisartut kaammattorneqarput qaleralinnut qassutinik kivisimasunik piaaqqulugit.
Sumiiffiit ataasiakkaat qassutaarsiutinik qalluiffigineqartariaqartut tassaapput Upernaviup eqqaani ”Kulteqarfimmi” Gieseckes Isfjord aammalu Ikermi (Aappilattup (avannarliup, aaqq.) Ikerani).
Aalisarfiit allat qassutaarsiutinik qalluiffigineqartussat aalisartut suleqatigalugit toqqartorneqassapput, aalisarnermut aqutsisoqarfik nalunaarpoq.
Qassutaarsiutinik qalluigasuarnissaq kaammattuutigineqarpoq sumiiffinni tamaani qaleralinniarnermi annertuumik ajornartorsiutaanerat peqqutigalugu. Qassutaarsiutinillu qalluinissaq piaartumik susassaqartunit tamanit peqataaffigineqartumik ingerlanneqarnissaa kaammattuutigineqarpoq.
Qassutaarsiutinik qalluinissami angallatit angisuut nukittuunik sipilillit pisariaqartinneqartut aalisartut ilisimaaraat tamannalu tunngavigalugu angallatit sorliit qalluinissamik piukkunnaateqartut Aalisarnermut, Piniarnermut, Nunalerinermullu Naalakkersuisoqarfimmi nalunaarutigineqarsinnaapput.
- Inatsisit atuuttut malillugit qassutaarsiutinik qalluinissaq aalisartut akisussaaffigaat, tassami atortunik pinngortitamut qimatsisoq imaluunniit mingutsitsisoq nalinginnaasumik akisussaasuummat, taamaattumik akisussaaffimmik manna tikillugu sumiginnaaneq iluarsiniarlugu ataatsimoortumik suleqatigiilluni qassutaarsiutinik qalluinissaq kaammattuutigissavara, Ane Hansen oqarpoq.