Umiarsuit takornarianik angallassisartut assortuussutaapput

Kangilinnguani Sakkutooqarfiup annaassiniarluni sungiusarnerata Kalaallit Nunaata avannaarpiaani ingerlanneqartup »Northern Deployment«-ip takutippaa, umiarsuarmi takornarianik angallassisummi ilaasumik Nares Strædetimi imaluunniit Sullualummi ajutoortoqaraluarpat tamanna ajornerpaamik kinguneqarsinnaasoq.

Kalaallit Nunaata/Canadap imartaani isorartoqisumi umiarsualivik itisuutuaq tassaavoq Pittuffimmiittoq, kisianni ilaasorpassuit untritilikkaat ajutoorsimasut aammalu ilaasut sinneri kiisalu umiarsuarmi inuttaasut umiarsuarmi ikuallattumiit sakkutooqarfimmukaassussallugit ajornakusoortorujussuussaaq.

Sungiusarnermi uppernarsineqarpoq timmisartup Challengerip qanoq pingaaruteqassusia, taannami atorlugu ajutoornerup qanoq annertutigineranik paasinnilertortoqarsinnaammat.

Ullumikkut timmersartoq Challenger qaammammut ullut arfineq-pingasuinnaat Kalaallit Nunaanniitsinneqartarpoq. Sillimaniarnermut piareersimaneq annertusarniarlugu Kangilinnguani Sakkutooqarfiup kissaatigaa Kalaallit Nunaata silaannartaani Challengerimik piareersimasoqartuarnissaa.

– Iluarsiissutissaq alla tassaasinnaavoq, umiarsuit takornarianik angallassisartut kalaallit imartaaniitsillutik angalanerminnik ataqatigiissaarisarnissaat, taamaalillutik nalunaaquttap akunnialunnguani imminnut angusinnaanermikkut ikioqatigiissinnaallutik, taamak oqarpoq Kangilinnguani Sakkutooqarfiup naalagaa, sakkutut nalagaat kontreadmiral Henrik B. Kudsk sermitsiaq.gl-imut.

KIsianni siunnersuut tamanna takornariaqartitsinermik sulialinnit isumaqatigineqanngilaq.

– Sillimaniarnermut piareersimanissap annertusarneqarnissaanut siunnersuutit suulluunniit qujaruppagut, kisianni ingiaqatigiissitsisarnissamik piumasaqaat piviusunngortinneqarsinnaanngilaq, taamak oqarpoq Nunatsinni Takornariaqarnermi Inuussutissarsiornermilu Siunnersuisoqatigiinni Attaveqaqatigiinnermut takornariussualerinermullu siunnersorti Malik Milfeldt sermitsiaq.gl-imut oqarpoq.

– Umiarsuaatileqatigiiffiit pisisartut annertuumik unammissutigaat, kiisalu ingerlatsiviit marluk assigiimmik aqquteqarlutik angalatitsissappata ingiaqatigiillutik ingerlaarnissaq siunertaralugu, umiarsuarnik angalalluni takornariaqarneq ullutsinni takusaligarput, siunissami pigiinnarsinnaassanngilarput, Malik Milfeldt oqarpoq.

Aammattaaq sumiiffinni takornariartitsinermut peqatigiiffiit, umiarsuit takornarianik angallassisartut angisoorsuit marluk ataatsikkoorlutik illoqarfimmut tikittarnissaannut akerliupput. Illoqarfiit ilaasa ullormi ataatsimi innuttaasui marloriaatinngortarput, taamaalisoqarneranilu pisiniarfiit aamma takornarianik sullissisut taamak amerlatigisunik ataatsikkut tikittoqarneratigut malinnaasinnaanerat ajornakusoorsisarpoq.

Sermitsiaq normu 38-mi annertunerusumik atuarit...