Illut attartortittakkat akitsulerput

Namminersorlutik Oqartussat ilaqutariinnut ataatsinut ilaqutariinnullu marlunnut illut attartortittakkat akitsuiffiginiarpaat, ineqartut illusinissaat anguniarlugu.

Arsummi illut. Assi: Sermitsiap assiisivia

Illunik attartornermut akiliutit ilaatigut 50 procent tikillugu qaffanniarneqarput taamaasilluni illunik aserfallatsaaliinissaq akissaqartinneqalissaaq, ineqarnermut naalakkersuisoqarfik nalunaarpoq. Aserfallatsaaliinermi pineqarput oqorsaarsersueqqinnissaq aammalu teknikkikkut atortorissaarutinik nutarterinissaq.

Nunap karsiata illut tamakku aserfallatsaalinissaannut tapiinissamut periarfissaarunnikuupput, Ineqarnermut naalakkersuisoq Jens B. Frederiksen oqarpoq naalakkersuisooqatigiinnissamut isumaqatigiissut innersuussutigaa tassani allassimammat "innuttaasut sapinngisamik amerlanerpaat namminerisamik inimik pigisaqarnissaat anguneqartariaqartoq - soorlu maannakkut inissiat attartortittakkat nammineq pigineqarsinnaanngorsinnerisigut.

- Maannamut ilaqutariit ataatsit marlulluunniit illuinik attartortut periarfissinneqassapput attartortuuinnarnissamik imaluunniit attartortumiit piginnittumik aaqqiineq atorlugu inigisamik piginnittunngornissaminnik eqqarsaatigissallugu.

Inissiat pisiarineqarsinnaapput illusiniarnermi akit naapertorlugit, illoqarfinni minnerni isorliunerusunilu illut akii appaseqaat, Jens B. Frederiksen oqarpoq.

Naak, ilaqutariit ataatsit marlulluunniit illuinik attartornerup akia qaffangaatsiassagaluaq taamaattoq inissiarsuarni attartukkanit akiliutaasartoq suli annikinnerusoq Ineqarnermut naalakkersuisoqarfik nalunaarpoq.

Powered by Labrador CMS