Inissiarsuarni ineqarneq akitsulerpoq
Aappaagu marsip aallaqqaataaniit inissiarsuarni ineqarneq akitsussaaq, peqatigisaanillu blokkit tamarmik ataatsimut katineqassapput.
Akiliutilli qanoq akitsortigissanersut ineqarnermut naalakkersuisup Jens B. Frederksenip oqaatiginngilaa.
Akitsuineq peqquteqarpoq inissiarsuarni iluarsaassinissaq annertungaatsiartumik kinguaattooruteqarfiusoq Naalakkersuisut paasimmassuk.
Ineqarnermut akiliutit sapinngisamik appasinnerpaatinniarlugit najugaqarfiit nuna tamakkerlugu najugaqarfimmut ataatsimut kattunnissaat Naalakkersuisut aamma aalajangerpaat. Kattunnissaq pissaaq januaarip aallaqqaataani 2010.
- Ullumikkut ineqarnermut akiliutit najugaqarfinni aqutsiffiusuni arlalinni inissiat naatsorsuuserinikkut agguataarneqarnerisigut naatsorsorneqartarput. Paasinarsisimavoq naatsorsueriaaseq taanna allaffissornikkut pisariuallaartoq naleqquttuunngitsorlu, najugaqarfiit ataasiakkaat aningaasaqarnikkut sunnertiasorujussuummata, naalakkersuisoq allappoq.
Allannguinissamut atatillugu ineqarnermut akiligassanik ersarinnerusunik, tunngavissat assigiit, ersarissut paasiuminarnerusullu tunngavigalugit suliarineqarsimasunik, tamatumalu peqatigisaanik aserfallatsaaliuinermi suliassat pisariaqartinneqartut suliarinissaannut aningaasanik pisariaqartinneqartunik peqarnissamut qulakkeeriffiusunik akiligassiisoqartalernissaa aalajangerneqarpoq.