Nuummut motoorerujussuaq

Nukissiorfiit Nuummi sillimmatitut innaallagissiorfissamut motorimik aamma innaallagissiuummik (generatori) pisiniarpoq. Motoori 18,3 meterinik takissuseqarpoq 358 tonsinillu oqimaassuseqarluni.

Nuummi Nuup Saavani nutaamik sillimmataasussamik innaallagissiorfiliortoqassaaq. Motoorissaa generatorissaalu ilaqutariinnut illutut angitigissapput. Assiliisoq: Leiff Josefsen

Maskiina ilaqutariit illuattut angitigisoq 358 tonsinillu oqimaatsigisoq Nuup illoqarfiatigut assartorneqalerpat suliassaassaaq imaannaanngitsoq.

– Nukissiorfiit oqaluttuarisaanerani atortut dieselitortut aatsaat taama angitigaat. Anginerpaat ullumikkut pigisavut Nuup saavaneereerput tamarmillu 6,4 MW-iullutik, Nukissiorfiit sanaartornermut pisortaat Lars Hoffmeyer nittartakkaminni oqaluttuarpoq.

Motoori generatorilu pisaarineqartussat 17 meqawattimik sarfaliorsinnaapput.

Taamak angitigisumik motorimik aamma generatorimik pisariaqartitsilernermut pissutaavoq Nuummi ineriartupiloorneq.

Motoori generatorilu 18,3 x 5,1 x 5,9 meterinik uuttuteqarput 360 tonsinillu oqimaassuneqarlutik.

– Taakku tamarmik marlunnut avillugit Nuummukaanneqassapput Tuluit Nunaanni Italiamilu fabrikkinit umiarsuaq immikkut ittoq aqqutigalugu, Lars Hoffmeyer angallassinissamut periarfissanik periarfissaanngitsunillu tamanik misissuisimasoq oqarpoq.

– Tamatuma kingorna motooritaa blokvogninik illoqarfikkoorunneqassaaq. Taanna tamarmiulluni 360 tonsit missaannik oqimaassuseqassaaq ilaqutariinnullu ataatsinut illutut marlunnik quleriilittut angitigissalluni, Lars Hoffmeyer pilersaarutip suliassartaasa aallartinnissaannut qilanaartoq oqaluttuarpoq.

Pingasunngormat nukissiorfiup pisortaata Svend Hardenbergip aamma sanaartornermut pisortap Lars Hoffmeyerip finlandimiullu pisiffigisat Wärtsilä isumaqatigiissummik atsiorput.

Naatsorsuutigineqarpoq Nuup Saavani sillimmatitut innaallagissiorfissap 2011-mi atorneqalernissaa. Nuup Saavani innaallagissiorfissaq nutaamik illutaliunneqassaaq, taanna decembarimi suliariumannittussarsiuunneqassaaq.

Powered by Labrador CMS