Kalaallit Nunaat tassaanngilaq Uganda
Akerliissorujussuuvoq Kalaallit Nunaat nunanut G77-imut ilaasortanut ilanngunniarmat, silap pissusiata allanngoriartornera pissutigalugu Maldiverne imaanut morsulersoq Kalaallit Nunaatalu kissaatigigaa CO2-mik annertunerusumik aniatitsinissani, Det Konservative Folkeparti sinnerlugu Kalaallit Nunaannut silallu pissusianut oqaaseqartartoq oqarpoq.
- Kalaallit Nunaat Uganda-naniluunniit Tanzania-ngilaq, Kalaallit Nunaatalu G77-imi gruppimut ilanngunniarnera uppernarpianngitsutut isigaara. Takorloorneqarsinnaavoq Maldiverne-p, silap pissusiata allanngoriartornera pissutigalugu qanittukkut imaanut morsulersup, aamma Kalaallit Nunaata, CO2-mik annertunerusumik aniatitserusuttup, akornanni oqallinnissaq. Tamanna akerleriissuterpassuaqarpoq, det Konservative Folkeparti sinnerlugu Kalaallit Nunaannut silallu pissusianut oqaaseqartartut Per Ørum Jørgensen oqarpoq.
Taassuma takorusunneruvaa silap pissusia pillugu ataatsimeersuarneq Kalaallit Nunaata pitsaasumik atorniassagaa, tassa qularinngilluinnaramiuk silap pissusianut qulartumik isiginninnermigut Kalaallit Nunaat imminut pisarerujussuassasoq.
- Nalunngilara Kuupik Kleist inuk silatuujusoq takorluugaqartuullunilu, taamaattumillu soorunami aamma nalunngilaa silap pissusia pillugu ataatsimeersuarnissaq Kalaallit Nunaannut kinguneqarluarsinnaasorujussuusoq aningaasaliisunik nutaanik pilerisitsilernissamut silallu pissusianik annertunerusumik takornariaqartalernissamut. Nunarsuarmiummi Danmarki kisiat isiginianngilaat, aammattaarli Kalaallit Nunaat isiginiartorujussuullugu. Taamaattumik silap pissusianut qulartumik isiginnittoqarpat qularutiginngilara Kalaallit Nunaat imminut pisarissasoq, Per Ørum Jørgensen oqarpoq.
Per Ørum Jørgensenip qularutiginngilaa CO2-mut pisussaaffinnik Kalaallit Nunaat Danmarkilu isumaqatigiissuteqarumaartut, kisitsisinilli saqqummiussiuminaappoq nunat ataasiakkaat pisussaaffii takutinnagit.
- Aatsaat silap pissusia pillugu ataatsimeersuarnerup kingorna tamanna takussavarput. Naalakkersuisunit paasitinneqarnera malillugu isumaqatigiinniarnerit anguniagalimmik akaarinnittumillu ingerlanneqarsimapput.
- Qularnanngilaq uagut qallunaat tungaannit siuariartornermi periarfissat eqqarsaatigissavigut aamma Kalaallit Nunaanni, imaanngilarli silap pissusianut iliuuseqarneq siuariartornerlu akerleriissuteqartorujussuussasut. Danmarkimi 1970-ikkunni uuliamik ajornartorsiortoqalerneraniilli nukissamik atuinerput uninngatiinnarsinnaasimavarput aningaasarsiornikkut siuariartorujussuugaluarluta. Tamanna mingutsitsinngitsumik suliffissuaqarnermik kinguneqarsimavoq. Kalaallit Nunaat aamma mingutsitsinngitsumik siuariartorsinnaavoq, Per Ørum Jørgensen oqarpoq.