Nerisassanik isumasioqatigiinneq iluatsilluartoq
Kommune Kujallermi nerisassanut piginnaatitaaneq qanilleriarujussuarpoq, Borgmester Simon Simonsen oqarpoq, Narsami INUILI-mi iluatsilluartumik nerisassat pillugit isumasioqatigiinnerup kingorna.
- Maanna suleqatigiissitaliussaagut takorluukkamik piviusunngortitsisinnaasumik aammalu iliuuseqarnissamut pilersaarutinik piviusunik suliarinnissinnaasumik, borgmester Simon Simonsen oqarpoq, taassumalu tunisassiortunit, ingerlatsivinnit, kattuffinnit suliffeqarfinnillu tapersersorneqarnerujussuaq nuannaarutigaa.
Inuussutissarsiornermut ataatsimiititaliami siulittaasup Kalistat Lundip isumasioqatigiinneq aamma naammagisimaarluarpaa:
- Kinguneqarluartussamik isumasioqatigiissimavugut siumut isiginnittunik pitsaasunik oqallilluta, annertoorujussuarmik tunineqarluta qanoq isilluta nerisassatigut ineriartorneq aallartissinnaaneripput. Imminut pilersornermut, kalaallit tunisassiaannik atuinermut, suliassanik nutaanik tigusinissamut aammattaarli siuariartornermik ineriartornermillu pilersitsinermut atatillugu.
- Kujataa nerisassatigut arlalissuarnik oqartussaaffeqareerpoq, taamaattumik pissusissamisoorluinnarpoq Narsap nerisassanut qitiutinngortinneqarnissaa, INUILI qitiutillugu Oqartussaaffeqarfimmik pilersitsinikkut, ataatsimiititaliap siulittaasua naggasiivoq.