Nunatsinnut takornariartarneq nutaamik iliuuseqarfineqarnialerpoq
Nunatsinni Takornariaqarnermut Inuussutissarsiornermullu Siunnersuisoqatigiit (NTIS) aamma Air Greenlandip 2010-mi takornariartitsinissamut iliuusissatut pilersaarusiorneq oqaluuserisimavaat.
Kalaallit Nunaannut 2009-mi takornariartut amerlassutsimikkut malunnaatilimmik ikileriarsimapput kiisalu immikkut ilisimasallit nuimasut siulittuutigaat, tamanna 2010 pitsaanerunavianngitsoq. Tamanna tunngavigalugu NTIS-ip siulittaasua Bjarne Eklund, sapaatit akunnerata matuma siuliani oqarpoq iliuuseqarnissaq piariaqarluinnartoq, taamaattumillu NTIS 2010-mi takornariaqarnerup iluaquserniarlugu iliuseqaqqinnissamut siuttuujumaartoq.
- Uanga Air Greenlandip pisortaanera Michael Binzer ataatsimeeqatigaara kiisalu NTIS-imi aamma Aor Greenlandimi nittarsaassinermik suliaqartut, kiisalu maannakkut uagut aallartereerpugut ajornartoornermi iliuusissat piareersarlugit, taamaaliornitsigut takornariaqartitsinermi 2010 tunisaqarnerunissamut ikiorsiiniarniarluta. Oqaatigilluaannarlugu tyskit pisisartut annertunertunerusumik ilungersorfiginiarlutigit, taamatuttaarlu qallunaat tuniniaaviginiarneranni iliuutsinut aningaasat marloriaatinngorlutigit, tamannalu maannakkorpiaq ingerlapparput, Bjarne Eklund oqarpoq.
Nunatsinni Takornariaqarnermut Inuussutissarsiornermullu Siunnersuisoqatigiit takornariaqarnermik suliallit tamaasa ataatsimiitinniarlugit piareersaasiorpoq, tamannalu ingerlanneqassaaq Vestnorden Travel Martimut (Nunat Avannarliit Kiillit takornariartitsisartunut tuniniaanerat) atatillugu, kiisalu siunniunneqarpoq NTIS aamma Air Greenland tamanna nallerpat toqqaannartumik tyskinut pisisartunut pilerisaarilersinnaaneq nutaaq saqqummiunneqassasoq.
Tamatumunnga ilaapput tyskit angalanernut tuniniaasartuisa paasisassarsiorlutik angalatinneqarnissaat anguniarneqarporlu kalaallit takornariaqarnermik ingerlatsisut tamanna akileeqataaffigissagaat. Tamatuma akerlianik NTIS aamma Air Greenland suliniummut annertuumik aningaasaliissuteqarniarput. Missingersuutit qanoq annertutigissanersut maannakkut NTIS-imi aamma Air Greenlandimi sulisut suliaraat.