Aatsaat taama ititigisumi Sermersuarmi qillerisoqarpoq

Sermersuarmi avannamut kitaata tungaani sullulimmik qillerinerit NEEM ukioq manna nutaamik rekortiliipput. Qillerutit nutaat atorlugit sermersuarmi 1758 meterinik qillerisoqarpoq tamannalu nunarsuatsinni rekortiliineruvoq, piffissami qilleriffiusup ataatsip ingerlanerinnaani.

Sermersuaqarfiusup nalaaneersoq sermersuarmi avannamut kitaata tungaani qilleraluni NEEM-ip sermeq misissugassaq peerpaa. Assiliisoq: Sermitsiaq.

- Sermeq qillerinitsinni qaqitarput 38.500-it tikillugit pisoqaassuseqarpoq, taamaattumik qangarsuaq sermersuaqarnerata nalaa tikipparput, silap pissusiata allanngorluinnarnerata nalaanut. Sermersuaqarnerata nalaani silap pissusiata allanngoriartorsimanera misissussallugu pissanganassaaq. Sermersuaqarnerata nalaani Kalaallit Nunaata sermersua Canadallu qeqertaasa sermersuartaata imminnut ataqatigiissimanerat paaserusutatta ilagaat, taamatut oqarpoq ilisimatusaatigalugu sermersuarmi qillereqataasoq Dorthe Dahl-Jensen, knr.gl allappoq.

Aappaagu ilisimatusartut suli itinerusumut sermersuarmi qilleriniarput, taamatullu piffissamut suli qangarsuaanerusumut uterlutik. Anguniarpaat piffissaq Eem-imik taaneqartartoq uterfigissallugu, ukiut 115.000-it matuma siornatigut taamaatittoq. Taamanikkut kiattarpoq Kalaallit Nunaat ullumikkornit kiassutsinik tallimanik kiannerusarluni, taamaattumik siunissami silaannaap kiannerulernerani qanoq pisoqarumaarneranut tunngasunik paasissutissanik tamanna pissarsiffiusinnaavoq.

Neem-imik suliniut nunat assigiinngitsut 14-it akornanniittut suleqatigiissutigaat aasallu ingerlanerani ilisimatusartut 100-t sinneqartut qillerinermi suleqataapput.

Powered by Labrador CMS