Peqqissaasut hollandimiut Nunatsinnut
Peqqissaasut arfineq-marluk Hollandimeersut misiligutaasumik atorfinitsinneqarnissaat peqqinnissaqarfiup maanna sulissutigaa. Hollandimiut pillugit Danmark maannakkut pitsaasunik misilittagaqareerpoq.
Dronning Ingridip Napparsimavissuani peqqissaasut marluk sapaatit akunnerata tulliani Hollandimukassapput peqqissaasunik atorfinitsinneqarsinnaasunik oqaloqatiginnikkiartorlutik.
ALLAASERISAQ ATUARUK: Vikarit aalajangersimasumillu atorfillit aningaasarsiamikkut assigiinngissutaat annertoqaaq
Dronning Ingridip Napparsimavissuani peqqissaasut pisortaat KNR-imut ilisimatitsivoq oqaatsit apeqqutaanerpaassasut hollandimiut peqqissaasut, ilinniarluarsimasuusut, Nunatsinni atorfinitsinneqarsinnaanissaannut.
– Oqaatsit pingaaruteqartorujussuupput napparsimasunik passussissagaanni suleqatigiillu imminnut oqaloqatigiissinnaanissaannut. Paasissutissat pingaaruteqarluinnartut napparsimasup aamma peqqissaasup, nakorsap allallu peqqinnissakkut imaluunniit avataaneersut sullissusut akunnerminni paasissutissiissuteqatigiissutigisarpaat tamakkulu allattorneqarlutik nalunaarsuinermi ilanngussorneqartarput, Maybritt Andersen KNR-imut oqarpoq.
Pilersaarutaavoq hollandimiut peqqissaasut isumaqatigiissutit nalinginnaasut naapertorlugit ukiuni pingasuni atorfinitsinneqarnissaat. Taakkunannga marluk sinerissami, allallu tallimat Dronning Ingridip Napparsimavissuani.